Penyampau bantu bah patut ditambah – Convas

KUCHING: Gerempung Sada Penguna Sarawak (Covas) ngansak perintah nengeri nambahka penyampau bantu ngagai orang tasah bah ba nengeri tu.
Sapit Presiden Covas Datuk Shamsudin Abdul Rahman madah, beratika penusah bah ke nuntung nengeri tu lebih agi ba sitak Kuching, perintah endang patut nambahka penyampau bantu RM500 tauka RM1,000 ngagai sida ke tasah bah.
“Dikena ngelempung tating penusah sida tu, perintah besau udah ngagihka bantu RM500 ngagai sepintu ruang bilik ke tasah bah.
“Diatu perintah nengeri mega patut mantu sida,” ku iya madah ngagai Suara Sarawak, kemari.
Ku iya, kitai Sarawak patut nunda pelin manah ke dipejalaika Kaunsil Mengeri Kuala Lumpur (DBKL) ke meri bantu RM2,500 ungkup sepintu bilik ke tasah bah.

Gaya pendiau Rumah Panjai Gimang, Lidong Baru di Betong dituntung penusah bah, apin lama ke udah. – Gambar Bomba

Ku iya ketegal penusah bah tu mayuh reta tengkira ruang bilik rusak.
“Nya utai ke enda ulih diseliah ambika banding keresa rumah sida rusak baka jemari, sofa, tilam enggau perengka guna karan,” ku iya.
Shamsudin madah bantu belanja endang diguna amat jam diatu lalu arapka peminta nya bisi didinga Menteri Pengintu Pendiau, Pengelantang Komuniti, Orang Indu, Ruang Bilik enggau Pemansang Anak Mit Datuk Seri Fatimah Abdullah awak ngenataika peminta tu ngagai perintah ke pemaik rayat di nengeri tu.