Penyampau KIR dibantu nambah 24.4 peratus

KAPIT: Bisi nambah 24.4 peratus penyampau Tuai Bilik (KIR) nerima bantu barang pemakai ba selampur nengeri ungkup taun tu.

Kepala Menteri Datuk Patinggi Abang Johari Tun Openg madah, ari penyampau nya bisi 473,558 KIR ke nerima bantu pemakai beungkus RM35.5 juta taun tu dibanding 380,762 KIR beungkus RM16,400,000 ba taun nyin kemari.

“Ba sitak menua pesisir, nyau deka semua KIR nerima bantu barang pemakai.

“Tang ba sitak mengeri, bantu tu lebih dikemerat ngagai raban B40,” ku iya.

Iya madah munyi nya ba Pengerami Nyuaka Bantu Bekal Pemakai Sarawakku Sayang (BKSS) di Pasar Kapit ditu kemari.

Tandu Abang Johari, beduduk ari penyampau bantu pemakai ke bisi nambah ari RM16.4 juta taun nyin kemari ngagai RM35.5 juta taun tu.

“Tu mandangka penyampau agih belanja nambah 116 peratus ungkup pengawa meri bantu pemakai tu.

“Kitai mega udah ngagihka RM5,000,000 ungkup ungkus perengka pangangkut nganjung barang pemakai ungkup taun tu,” ku iya.

Kenu ku iya, penyampau tuai bilik ke patut nerima bantu tu udah dikelala nengah saup Palan Servis bekaul, sereta Tuai Raban Bansa enggau Tuai Rumah (KMKK) ba pelilih menua diri.

“Komiti Penyangga Penusah Bagi Menua (DDMC) bela ngagai pemutus pasal barang pemakai diberi bepelasarka guna ba palan komuniti nya.

“Statistik ke ditemu naka 10 Jun 2021 kena 1 pagi ari DDMC, madahka sepenyampau 175,916 tuai bilik (37 peratus) bantu pemakai udah dianjung ngagai selampur Sarawak,” ku iya.

Sama bisi datai Sapit Kepala, Tan Sri James Jemut Masing, Datuk Amar Douglas Uggah enggau Datuk Amar Awang Tengah Ali Hasan sereta Menteri Pengintu Pendiau, Pengelantang Komuniti, Orang Indu, Ruang Bilik enggau Pemansang Anak Mit Datuk Seri Fatimah Abdullah.

Suara Sarawak