Penyampau positif Covid-19 di Sarawak mengkang 555 kes

KUCHING: Penyampau kes positif ba nengeri tu mengkang 555 kes berindik ari nadai sebarang kes positif baru Covid-19 dirikod, sehari tu.

Sekretariat Komiti Penyangga Penusah Ngenyit Nengeri Sarawak (JPBNS) madah bisi siku ari kes positif sebedau tu udah suman lalu dikemendar pansut ari Sepital Sibu, sehari tu.

Naka kemari, bisi 525 iku tauka 94.59 peratus udah suman sereta pansut ari sepital.

Kelimpah ari nya, bisi tujuh kes Pesakit Agi Dipatau (PUI) diripotka kemari lalu dua kes PUI agu nganti pemutus ari makmal.

Ba lansa ke sama, JPBNS madahka sehari tu bisi 5,391 peminta pejalai entara pelilih menua diterima ba 28 bengkah Indu Opis Pelilih PDRM, lalu ngujungka bisi 127,138 iti peminta digaga.

Taja pia, semina 117,294 peminta aja udah dikemendar lalu 9,844 peminta enda dikemendar.

Raban pematau mega udah matau 1,847 endur ti nyengkaum makit besai (218), restoran (330), kilang (31), bank (165), opis perintah (96), Penjaja (15), tamu (114), palan besembiang (109), endur ngelantangka ati (43), taba projek (29) sereta 697 endur bukai.

Berebak enggau nya, JPBNS ngelalau mensia mayuh ngambika seruran nyaga takah enggau pangan diri sereta nyaga pemeresi ngambika kes positif majak kurang.

Ku JPBNS, kes ke diripotka sebedau tu kelai positif asil ari Atur Tagang Pejalai (PKP) enggau Atur Tagang Pejalai Besyarat (PKPB).

Nengah pengawa muka sektor ekonomi enggau rama chara berenggat, pengawa nyaga pemeresi meseti diterenak ba genap serak umur.