KUCHING: Penyarut politik enggau berebutka kuasa entara parti politik tau ngeruga pemansang ekonomi.

Kepala Menteri Datuk Patinggi Abang Johari Tun Openg madah, mata wang luar deka kurang lalu bala pemeranak puku mega enggai beranakka puku ba menua tu tauka nengeri ke majak charut ketegal politik.

“Taja mayuh utai diperambu perintah, agih belanja besai enda nyamin pemujur enti gaya politik enda tegap,” terang iya.

Abang Johari mansutka jaku nya ba Pengerami Ngintu Hari Sarawak, malam tadi.

Nambahka nya ku iya, polisi industri Sarawak terus mansutka asil enggau beranakka puku tambah ari empat serikat ba Taman Perindustrian Samajaya penyampau RM6.31 bilion.

“Zon Industri Samalaju mega disadang nerima RM13.8 bilion enggau pengawa numbuhka sebuah loji pemansut besai ba sebuah serikat ari menua China.

“Beribu rayat kitai kelebih agi bala nembiak udah bulih kereja di Samajaya enggau Samalaju lalu kereja ungkup nembiak mega nambah lebuh bisi beranakka puku,” terang iya.

Iya nyemetak madah, Perintah Sarawak ulih nyendiaka pengawa puang ngagai rayat iya nengah program industri nya asil polisi jauh tinjau penemu.