PENANYI tebilang enggau lagu Abi Pengerindu Tua, Dayana Shini mujur ngeluarka lagu pemadu baru diri ti pejuluk Selantang Timang.

Lagu nya mujur dikeluarka ba pelasar YouTube TJKSB Music Production kena 17 June tu tadi lalu dalam timpuh tiga minggu, lagu nya dipeda lebih 3,000 orang.

NGUNDAN JAKU DALAM
Lebuh kitai beratika leka lagu Selantang Timang, dia deh kitai mayuh tetemuka jaku dalam enggau jaku silup ti jarang didinga.

Penengkebang lagu, Aya Lih Achop madah, iya ngembuan pengandal ati ti besai lagu nya ulih nyaguka jaku Iban.

“Bansa kitai patut temegah laban kaya enggau jaku dalam, jaku silup, jaku kelaung enggau jaku sempama.

“Tang chukup sayau laban tebal agi nembiak rebak baru kemaya hari tu enda nemu jaku dalam enggau jaku silup bansa diri.

“Nya alai, tu meh peluang enggau pelasar manah dikena sida belajarka leka jaku tu,” ku iya.

PENYAYAU INDAI
Ngelansa senentang lagu Selantang Timang, penengkebang lagu nya madah, lagu nya nyeritaka penyayau indai ngagai anak diri.

Ku iya, kitai bela nemu, indai meh orang ti pemadu semak enggau bala anak berengkah ari dalam kandung nyentuk sida mansang besai.

“Pengerindu enggau penyayau indai endang tuchi baka ambun tumu pagi, angat baka panchar mata panas gegelik tengah hari.

“Lagu tu bekenangka pemesai pengasih, penyayau, pengerindu, penyiru, pengandal enggau pengarap indai ngagai anak.

“Nya alai, lagu tu diberi pejuluk Selantang Timang ti ditusun ngena rambai leka timang Lemambang.

“Ambi ke chunto, ‘ditatang baka bulan enggau bintang, digela baka emau gempanang, anak nyadi ke penyangga nyawa, lanting pengidup, reta pesaka indai ti pemadu berega’,” terang iya.

Ketegal penyayau ti besai, ku iya, nya kebuah indai enda belampung ati ngintu enggau ngemparuka kitai nyentuk ke besai kelimpah ngarapka kitai ulih nyadi orang menyana dudi hari.

“Nyangka diatu kitai udah besai tuai tauka bisi ruang bilik kediri empu tang ba indai, kitai tetap baka anak mit lalu penyayau sida enda bebali nyentuk sida sulai lesi ke Batang Mandai.

“Nya alai, bebasa, bejaku siru enggau intu meruan meh indai enti sida udah tuai lalu anang sesekali bejaku kasar tauka datai jari ngagai sida.

“Undang meh sida selalu, betelefon meh nanya ke berita sida lalu beli meh utai dikeinginka sida seagi-agi sida idup ba dunya tu.

“Tang enti sida udah pulai ke Batang Mandai, dedui pen kitai nyabak, rerauh meh kitai ngangau enda meh sida nikal pulai,” ku iya.

SUAH MASUK PEKIT BELAGU
Penanyi bebansa Melayu ti datai ari Miri nya madahka diri endang ngembuan pengerindu besai ba pengawa belagu.

Nya alai, sebedau ngaul diri ba dunya pemerindang, iya suah masuk bemacham pekit belagu kelebih agi ti diatur ba Bagi Menua Miri.

Ba taun 2018 suba, iya kala enggau orang ngeruh ai masuk Pekit Belagu Miri City Idol lalu bulih penuduk kedua.

Pia mega, ba taun 2019, Dayana Shini pen bela bulih penuduk kedua ba Pekit Belagu Miri Rising Stars.

Nyangka udah tuah penanyi ti rinduka lagu R&B enggau balada nya, ba taun sebaka, iya mujur bulih gelar champion ba Pekit Belagu Borneo International Kite Festival ti diatur ba Bintulu.

Udah nya, ba taun 2019 mega, iya bulih penuduk kedua rambau masuk Pekit Belagu Fikon Sarawak.

“Enti nadai penanggul, ba ujung taun tu, aku deka masuk renggat kepenudi ba Pekit Belagu Anugerah Charta Sapa Juara (ACSJ) ti diatur Radio Televisyen Malaysia (RTM).

“Pekit tu disadang deka diatur ba Bagi Menua Betong lalu aku deka nyadaka lagu aku empu iya nya lagu Abi Pengerindu Tua ti ditengkebang penengkebang lagu tebilang, NK Yongai.

“Nya alai, aku ngarap mensia mayuh kelebih agi bala peminat begempung nyukung aku ba pekit tu ila,” ku iya.

PEJALAI MERINDANG
Dayana Shini berengkah tepejuh ba dunya pemerindang industri muzik Dayak tu ba taun 2019 sereta nyadi artis ngatika diri tauka Independent.

Naka diatu, iya mujur ngeluarka tiga lagu single nyengkaum lagu Taja Naka Tu, Abi Pengerindu Tua lalu pemadu baru iya nya lagu Selantang Timang.

Pia mega, Dayana Shini bela bepadu nyawa enggau Chris Aidan nengah lagu Tua.

Ukai naka nya aja, serikat TJKSB Music Production agi meri pengandal ati ngagai iya nyadaka lagu pelandai lalu nya agi ba renggat perambu.

Dara bajik nya mega madahka diri deka ngeluarka mayuh agi lagu baru dudi hari dikena merindang mensia mayuh kelebih agi bala peminat iya.

PAIT MANIS MERINDANG
Baka bala penanyi bukai, Dayana Shini mega enda tinggal napi bemacham penguji sekumbang tepejuh ba dunya pemerindang industri muzik Iban.

Siti ari penguji besai ditapi iya baka penanggul nyebut leka jaku Iban ngena sebut ti semitan.

Dayana Shini siku penanyi bebansa Melayu tang ransing ngaul dunya pemerindang industri muzik Iban.

“Amat pen aku nemu jaku Iban tang tu semina jaku Iban ti diguna kitai besehari-sehari tauka dikumbai jaku Iban pasar.

“Lebuh aku bejaku Iban enggau bala bakih, peminat enggau semua orang, jaku Iban aku suah bechampur enggau jaku Melayu.

“Ambi ke chunto, lebuh nyadaka lagu Selantang Timang tu, aku enda meretika sekeda leka jaku ba lagu tu.

“Kebuah pia laban lagu tu mayuh ngundan leka jaku Iban dalam ti jarang didinga lalu pia mega tebal agi nembiak baru diatu pen enda meretika leka jaku tu taja pen sida tulin Iban.

“Nyau asai ke bebelit dilah lebuh nyebut leka jaku dalam ti bebungai,” tusui iya.

Iya madahka diri beterima kasih ngagai Aya Lih Achop, Flocee Den enggau Denn Al ti liat ati ngajar enggau ngembing iya nyebut leka jaku nya.

“Puji Tuhan, berekat ari embing sida sebuat, aku ulih nyadaka lagu tu enggau lanchar sereta ulih nyebut leka jaku tu ngena sebut ti semitan.

Dayana Shini beterima kasih ngagai bala peminat ti seruran nyukung pejalai iya ba dunya pemerindang.

“Enti nadai sukung ari kita, nadai meh nama Dayana Shini ba dunya pemerindang tu lalu terus ke sukung kita ngambi kitai ulih ngerichahka agi industri muzik Iban,” ku iya.

Ngena peluang berega tu, iya beterima kasih ngagai bala DJ radio Wai FM, Cats FM enggau Kupi Kupi FM ti seruran nebah lagu Selantan Timang ba churung radio.

Iya mega beterima kasih ngagai Benedict ti udah ngelakuka iya nengah surat berita sereta bala peminat ti seruran nyukung.