Penyelai motif Iban diangkat

SIMANGGANG: Ngepunka dagang ari bejualka produk digaga ari madu kelulut baka sabun enggau minyak angin, diatu ngerembai ngagai dagang baju dero, kain batik enggau kereban digaga ari manik kelimpah ari dagang pekayan ngena motif Iban dikeluarka Borneonative.

Nama Julie Bunjai Anak Robert Sanut chukup dikelala ukai semina ba menua tu aja, tang dataika tikas entarabansa nengah dagang online Borneonative ti laku sereta nerima peminta tinggi.

Ada di menua Simanggang kena 12 June 1967, indai enam iku anak tu madahka apai iya asal ari Nanga Engkeramut, Batang Kanowit di Julau seraya indai iya orang Simanggang empu.

“Aku diatu diau mendam di Simanggang ditu lalu bejalaika dagang ba sebuah kedai di pasar din lalu suah udah nguji muka mayuh macham dagang.

“Tu nyengkaum Simanggang Snooker Center (1987-1990), Sold Gold Karaoke, Pub & Lounge (1991-1998), Julie’s Cafe ba Uni Central Samarahan (2016-2019) enggau Eclipse Bar & Bistro Jalai Song Kuching (2019) ti semina beretan lapan bulan aja.

LANDIK NGEREBUT PELUANG… Julie Bunjai Robert Sanut

“Diatu aku fokus ngagai Solid Gold Enterprise ba Pasar Simanggang ke alai aku bejualka bemacham asil pengelandik jari, produk ari menua tu empu baka baju dero, dress enggau ke bukai,” ku Julie lebuh dirandau Suara Sarawak rambau Pengerami Makai Lemai Bejadika Serakup Tampun Juah Asal Iban (TAJAI) Sarawak, apin lama ke udah.

Nambahka nya ku Julie, fokus makit iya diatu iya nya bala kitai Dayak ari renggat umur entara 15 ngagai 70 taun laban bedau berengkah bejualka gari bala nembiak mit.

Naka diatu, semua pekayan dijual Julie ulih dikena orang besai tuai lalu iya madahka diri bisi perambu deka ngerembaika dagang ngagai menua bukai ngambika bansa bukai mega rinduka langkar motif kitai Iban.

Ngenang pelasar ngelakuka produk dijual iya, Julie ngena manah peluang dagang online ke bisi sebelah media rama baka Facebook enggau Instagram.

“Mensia mayuh ulih ngelawa Facebook aku benama Julie Bunjai Robert Sanut, Page JBead.co enggau akaun Instagram JBead.co.

“Aku mega bisi udah merambu ngelakuka dagang tu ngena chara bukai baka ngaga kain rentang enggau iklan ba radio tauka catalog.

“Nya alai aku ngarapka diri ulih ngerembaika rentayan dagang pekayan ngena motif Iban tu jauh agi, enti ulih nengkilah remang ke menua tasik,” ku iya andal.

Ungkup penerang semua kelebih agi sida ke apin nemu dini endur kedai bejualka produk ngena chap Borneonative tu ulih dilawa ba Pasar Simanggang.

Kedai ngena adres Solid Gold Enterprise nya ba No 38, Ringkat 1, Simanggang Plaza lalu sida ke jauh baka ari Kuching, Betong, Sarikei, Miri enggau bagi menua bukai ti deka meli tauka ngudar baju ari Julie, iya mega bisi nyendiaka servis ngena poslaju enggau J&T express.

Genap iku kitai endang bisi peransang kediri empu nadai ngira mit tauka besai. Baka nya mega Julie ti bulih peransang ari pemanah, pengelebih enggau penyelai produk ditempa ari jari iya empu.

“Peransang besai aku ba dagang diatu iya nya ngelakuka produk digaga diri empu, sabun enggau minyak angin ti 100 peratus digaga ari madu kelulut chulin.

“Siti ari pemanah produk digaga aku tu iya nya 100 peratus ngena produk asal, endang madu kelulut chulin. Baka nya mega produk bukai baka kereban penganta digaga ari manik, baju ngena motif Iban ti ulih diangkat ngagai makit tinggi agi.

“Ambika banding, semua produk dijual aku diatu ulih dijual kitai ngagai makit luar sereta bisi pengulih besai rembus ngagai makit entarabansa, besemekih enggau produk bukai.

“Orang ti rindu meda motif asal kitai Pulau Borneo tu ulih meli produk enggau muntang laban semina ba ujung jari aja tauka dikumbai rebak kemaya hari dagang digital.

“Sida tau meda produk dijual ba Facebook, Instagram enggau Page aku lalu enti sema tekait ati deka meli, tau nganjung pesan tauka betanya.

“Udah kededua piak setuju lalu mayar nitihka rega, aku ulih ngirum ngagai kitai enggau naka penyampat, tu ti disebut aku semua utai ujung jari aja diatu. Nengah randau ‘online’ pan ulih bedagang,” ku ini enam uchu tu lalu tuchum.

Ngenang pasal juluk ati diri, Julie lalu jenuh dulu sebedau nyaut tanya nya. Mua ti chiru ngayanka pemesai juluk ati iya bepelasarka peneleba enggau pemayuh dagang ti udah kala diuji tudah tuai.

“Juluk ati ba dagang tu diatu iya nya ngarapka aku ulih dataika ba tikas tinggi agi nyual produk sereta ulih ngangkatka nama menua Borneo tu.

“Kebuah pia laban menua kitai tebilang enggau penyelai motif ari bansa asal sereta kaya enggau macham asil pengelandik enggau keranjai jari nitihka peminta makit entarabansa.

“Aku mega bisi berunding deka nyual produk asli bukai ba kedai aku ditu baka produk pemakai enggau kereban lama bukai,” ku Julie nyimpul randau.