Penyelai tengkebang jari narit ati

PENYELAI produk ditengkebang ari tanah ladu, batu sungai, batu gemala, kristal, mutiara enggau manik entara pematak besai chap dagang Celistina Borneo Jewels.

Pemungkal enggau pengempu dagang, Celistina Being, 42 taun, ari Tenghilan, Tamparuli di Sabah madahka diri chukup angkunka pengawa pengelandik jari.

Ku Celistina, iya ngepunka dagang dalam taun 2010 pengudah chakah ngaul diri nyadi pengajar lalu ngembuan peneleba ngajar di Yayasan Sabah(2010-2012), ngajar raban di baruh program e-kasih (2013-2014) enggau nyereta pengawa mandangka kraf jari Malaysia.

Nya kebuah ku iya, Sarawak Timber & SMEs Expo 2019 tu nyadi pelasar besai ngagai pedagang mit baka sida mandang enggau ngelaku sereta ngerembai makit produk ke menua bukai kelimpah ari di Sabah.

“Nyerumba ekspo sekali tu, kami sebuat diarika anak aku empu, Carrie Christy Denvert disempulang bala bukai, besai pengarap produk diterima lalu dagang laku ditu.

ANGKUN… Celistina ngeringka semengat diri ngemai dagang kraf ngagai tikas tinggi agi.

“Tuji Tuhan udah diberi peluang nanggam kaul enggau rayat di Sarawak ti chukup kemerah sereta ngelalu penatai kami kitu enggau basa ti chukup,” ku Celistina lebuh dirandau Suara Sarawak.

Entara produk bisi dipandang enggau dijual rambau ekspo baka tengak ari Kristal, tinchin batu jed, tumpa enggau sementing temaga, tengak ari manik sereta mayuh ke bukai.

“Tebal agi sida ti datai ngelawa bansal kami rindu mega batu gemala ti digagaka tinchin, marik enggau tumpa kelebih agi batu jed ti nerima peminta tinggi.

“Pia mega aksesori ari batu Kristal ti digaga aku beranak (set) baka marik, gelang enggau tinchin ngena chura enggau gaya ti sama. Manding amat dikena sida ke indu.

“Produk ari seramik tauka tanah liat mega matak perati bala pengusung ti datai,” ku iya nampung.

JULUK BESAI… Carrie ngarika indai iya, Celistina mandangka produk ari Celistina Borneo Jewels rambau Sarawak Timber & SMEs Expo 2019 minggu nyin tadi.

Rega produk ku Celestina nitihka pemar aksesori ditengkebang kelimpah ngira barang dikena ngaga.

“Ambika chunto sementing ti digaga ari temaga berega RM3,000 tang rega ulih kurang agi. Rega produk kami endang ulih dibeli semua, berengkah ari RM10.

Ku iya, bemacham chara dikena ngangkatka produk kraf jari ngagai tikas ti ngemegahka menua lalu ekspo baka tu endang nipakka juluk nya.

“Aku endang nyukung tegut pengawa baka tu ti mantu kami pedagang mit maju sesingkang agi ke mua, besemekih enggau pedagang besai seraya ngiri penemu enggau nyerungkai peluang ti bisi.

“Ekspo sekali tu mayuh mandangka produk digaga ari buluh enggau kayu akasia lalu tu penemu baru ba aku empu, nyangka tau dikemansang nyadi produk kraf bukai kelebih agi ari buluh, dikena nambahka koleksyen diri,” ku iya nampung.

Nengah ekspo tu mega meri mayuh pengulih bukai sereta ngerapitka sintal kaul enggau bala bakih ti sama bedagang datai ari pupu bansa enggau menua nyengkaum ari Brunei enggau Indonesia kelimpah ari Sarawak enggau Sabah empu.

Celistina Enterprise tau dilawa nengah page Facebook Celis Tina tauka Instagram ClisnaborneoJewels sereta telefon nuju 013-5593776 enti deka nemu penerang enggau tanya silik pasal produk tauka servis bukai ti bisi disedia.

NARIT ATI… Penyelai produk kraf jari dijual matak penatai bala pengusung.

 

MANDING DIPEDA… Set marik kristial ti ditengkebang ari batu Kristal narit ati bala pengusung

Suara Sarawak