Penyelai turai ukir sulam narit ati Stephanie Ho

BINTULU: Pemekit pemadu biak Pekit Kain enggau Selampai Sulam diatur begulai CC Beauty enggau Keresa Kitai, Stephanie Ho tau nyadi chunto ngagai rebak baru angkunka kraf jari asal kitai Iban.

Taja baru manggai 19 taun, indu dara penakan Iban China nya chukup landik ngena pengelebih enggau pengelandik iya ngulihka belanja.

Stephanie tauka siru agi dikangauka Mie Mie madahka diri endang kenyau ari mit rinduka pengawa indu rumah panjai baka nusuk manik enggau nyulam.

“Agi mit suba, aku suah meda mak enggau ini mantaika kain tenun baka kain tating, pua kumbu enggau ke bukai kelebih agi maya bisi pengawa di rumah panjai.

“Ari nya tadi, aku tekait ati meda pemanah enggau penyelai buah tauka ukir asal ba kain tenun nya.

NEMBUKA SULAM… Mie Mie benung nyulam selampai diudar orang.

“Nyau besai agi umur, dia aku lalu nguji nurai ukir sulam, nunda sekeda ukir ke muntang dulu lalu berengkah nyulam.

“Keranjai jari terubah nya meh ti dianjung aku enggau orang ngeruh ai bepekit tu tadi.

“Aku endang nadai nyangka diri bulih lumur tiga laban sulam bala bukai mega nadai endur mantah,” ku iya tuchum manis lebuh berandau enggau Suara Sarawak.

Peranak Rumah Stendy Kuyan, Nanga Terusa di Sungai Poi, Kanowit nya madah, ibu iya benama Beatrice Sabang ti nyadi peransang iya mekuhka pengawa nyulam.

Tambah mega ku Mie Mie, ibu iya nya endang orang ti tebilang nama enggau tampak rita landik begagaka kraf jari ba rumah panjai sida din.

“Ibu aku tu meh ti ngajar enggau ngembing aku ba pengawa nyulam enggau kraf jari ke bukai ngelama tu.

“Iya mega chukup angkunka main asal kitai Iban lalu nyadi siku ari pengajar Ajat ba Serakup Pemanis Bintulu ditu.

“Kelimpah ari nya, aku mega kala ngulu kus ngaga baju Orang Ulu ba Pengajar Suzie Ala ari Sibu,” terang iya.

Ngenang dagang kraf sulam, Mie Mie madahka orang keterubah meli selampai sulam enggau sidan digitang ba dinding nya bakih indai iya empu.

Terubah suba, iya semina ngaga sulam enti bisi nerima udar aja laban ke agi sekula, mupuk chimit-chimit kena belajar enggau matih diri empu.

“Sida deka datai ke rumah, berandau betunga mua enggau aku enti ngudar sulam dikedeka ati baka milih chura enggau bansa ukir sereta pemanjai tauka pemesai kain tauka selampai nya.

“Nyau kelama, pengawa tudah aku nyau majak maju lalu mayuh ditemu bala bakih mak ngujungka peminta selampai sulam majak nambah.

LANDIK… Mie Mie mega bisi begagaka tangu manik.

“Udah nya aku nyau nemu enggau orang bekenaka media rama ngelakuka kraf sulam lalu nerima timbal chukup manah. Peminta pan nyau mayuh-semayuh diterima,” ku iya ti nerima pemutus peresa SPM 2020 kemari.

Dalam sehari ku Mie Mie, iya endang bisi nerima udar ari mensia mayuh lalu nya ti ngasuh ati iya ransing agi.

Asil dagang selampai sulam iya mega nyau belipat sekumbang Atur Mindah Betagang (PKP) diterit berindik ari pengerekai Covid-19 kena 18 March 2019 suba.

“Udah kemisi penggal terubah sekula, dientudika pengerami Taun Baru China 2019, udah nya menua bejalaika PKP ngujungka pengawa sekula nyau tejanggal.

“Laban mayuh awak, dia aku ngerindang hari enggau pengawa nyulam selampai enggau sidan ti ulih digitang ba dinding nyadika pemandang.

“Nya kebuah, dalam dua hari ulih tembu siti selampai lebuh nadai pengawa ke nanggul tauka utai nekul.

“Tang enti ukir sulam nya mar, panjai sereta besai deka ulih tembu enda kurang ari seminggu,” terang Mie Mie baru.

Sekumbang ngereja pengawa ngaul pengelandik jari nya, iya mega nadai kala enggau orang bisi kenyap tauka sebarang utai nanggul lebuh ngangkatka siti-siti ukir asal.

“Ari terubah suba nyentuk diatu, bedau ga aku kala bulih Kenyap tauka mimpi baka suah nyadi ngagai pengemeran pengelandik jari ke bukai.

“Semua pengawa dikereja aku enggau ati lantang sereta mujur nitihka diniat sebedau ngepunka pengawa.

“Buah kain digaga aku nadai tatak, sekeda chura moden enggau asal, bisi nya ngambi ukir pua kumbu, ukir Orang Ulu, chura beselat sereta ukir bungai Rose.

“Belebuh mega aku ngaga ukir tauka chura nitihka peminta orang ti ngudar sulam nya,” terang iya lalu tuchum manis ngayanka ngeli.

CHURA MANDING… Kain sidan sulam digaga Mie Mie ti udah dibingkai lalu digitang ba dinding.

Juluk ati Mie Mie ukai semina deka ngiga untung ari duit ringgit tang iya keran deka ngerempaika dagang kraf jari tauka sulam nya ngagai selampur Sarawak.

“Jemah ila, aku dekaka keranjai jari tu dikelala orang ba serap menua Sarawak nyentuk ke Sabah enggau ba tanah Semenanjung din.

“Enti ulih, selampai sulam tu ulih diterima ba makit dagang kraf di menua tasik kin baka produk kraf jari ti udah dulu rembus ba makit entarabansa.

“Nya alai aku naka ulih ngetanka kualiti kain enggau ukir sulam ari sukut pemanah, pengalus enggau chura ti setipak ngambi orang ke meli puas ati lalu ulih tetangkupka standard makit dunya,” ku iya madahka juluk ati diri.

Berindik ari nya, Mie Mie ngarapka pengawa pengelandik jari tu enda mudah lenyau ngapa diserunyut arus pemansang dunya tang semampai ngerembai.

“Aku ngarapka pengelandik jari semampai ditampung, dikereja, dikemeran enggau dikerindu nadai ngira umur, biak tauka tuai patut besaup ngetanka pengawa tu.

“Arapka rebak biak baka kami enggau rebak dudi ila sama narak ulah angkun enggau rinduka pengawa asal ti nyadi keresa berega enggau pesaka bansa kitai.

“Pia mega sida ke tuai patut nurunka penemu ngambi anak telesak dudi hari nemu penatai asal diri sereta ngelala pemanah, penyelai enggau penulin kraf jari aki ini sida.

“Munyi ku jaku sempama kitai, kelala buah ari langu, kelala bansa ari jaku, sereta anang malu mandangka penatai enggau main asal diri di mata dunya,” ku Mie Mie nibarka jaku peransang.

Suara Sarawak