MUKAH: Penyerakup, begempung, begulai enggau bungkur semua beguna amat dikena nyapai status wilayah maju manggai ba taun 2030, ku Menteri Pemansang Indu, Nembiak Mit enggau Pengelantang Komuniti, Datuk Seri Fatimah Abdullah.
“Pekara tu patut dipugu ngena semangat bisi tanggungpengawa ba pekara politik rama begulai enggau integriti.
“Tu dikena nyamin penyulut betampung Sarawak dikena nyapai status wilayah maju manggai taun 2030 baka ba Strategi Pemansang Pengudah COVID-19 (PCDS) 2030,” ku iya.
Fatimah mansutka jaku nya rambau Program Begelumu Ngintu Pengerami Hari Kebangsaan Ke-66 Renggat Nengeri Sarawak 2023 ba Balai Mayuh Guna Politeknik Mukah ditu, kemari.
Ku iya, nya setipak enggau konsep ngintu Hari Kebangsaan taun tu iya nya bungkur semua lalu perintah nengeri seruran nyamin pekara rama rayat ti begunaka bantu berengkah ari sida ada nyentuk sida nyadi orang tuai.
Nya alai, ku iya, rayat Sarawak diperansang mantaika semangat taluk enggau sayauka menua.
“Pekara tu ulih dipandang nengah pengawa ngitau tambai Sarawak, Jalur Gemilang enggau nyadaka lagu patriotik.
“Ulah ti sayau enggau taluk ke menua beguna amat laban ulih nempa kitai nyikap diri enggau bisi tanggungpengawa begulai mangku pengawa diri tauka tanggungpengawa sivik ke pemaik begulai,” ku iya.
