KUCHING: Rambai jaku Hari Malaysia 2023 siti ari insiatif mai rayat ba selampur menua tu belematika reti buah runding enggau polisi pemansang bansa merdeka ti mujur enggau nempa penyerakup nyadi pugu besai dikena nyapai penyulut.
Premier Sarawak, Datuk Patinggi Tan Sri Abang Johari Tun Openg madah, rambai jaku Hari Merdeka, ‘Malaysia MADANI: Tekad Perpaduan, Penuhi Harapan’ nya mai rayat ngembuan budaya tamadun ti tinggi.
“Tu siti kangau ngagai semua rayat Malaysia ngambi duduk sama baruh lalu bediri sama tinggi bepelasar ke ulah ti bebasaka pangan diri ba sebarang pekara ti nyadi dikena nempa menua ti tebilang dudi hari.
“Tu nyengkaum pengawa ngemeranka ulah beserakup nyadi pugu besai dikena nyapai penyulut ba pemansang kemaya hari tu ti nadai betatak,” ku iya ba Pesan Hari Malaysia 2023.
Iya mega ngansak semua rayat Malaysia belematika rambai jaku ti mujur pilih ba taun tu.
Ngelansa silik, ku iya, ba Sarawak semangat beserakup enggau bebasaka pangan diri entara pupu bansa nyadi pekara dikemerat lebuh mantaika buah runding nuju pemansang.
“Rambai jaku ‘Segulai Sejalai’ nyadi pemun dikena mantaika pemereti ati entara semua rayat enda ngira bansa enggau jalai pengarap ngambi bela ngasaika pemansang sereta pengelikun ba tanah betuah tu.
“Nya alai, aku ngarap sereta besampi ngambi Malaysia terus maju enggau nyingkang ke mua bepanggai ba semangat beserakup, bansa ti tegap ngambi menua kitai terus dipebasa ba rantau tu tauka antarabansa.
“Ngarap Malaysia enggau Sarawak terus dijaga Tuhan enggau manah sereta likun ti betampung, muntang ba semua pengawa kelebih agi ngemansangka menua ngagai tikas ti lebih tinggi enggau nyulut agi,” ku iya.
