KAPIT: Sesebengkah menua ke tegap beduduk ari kaul rayat pupu bansa ti manah, seruran beserakup enggau nemu bebasaka pangan diri, ku Wilson Nyabong Ijang.
Kaban Kunsil Nengeri (Adun) Pelagus nya madah asil ari penyerakup dia kitai ulih bebagi penemu ke manah ngagai pangan diri dikena napi pemar dunya.
“Penyerakup endang beguna amat dikena nyamin pengelantang enggau pemansang menua,” ku iya.
Iya madah munyi nya rambau bejadika Program Perambu Atur Penyerakup Menua (PTPN) ke digulu urung 195 iku orang ba Dewan Suarah ditu, kemari.
Rambau program tu mensia mayuh dilalau meri buah penemu ambika ulih diperati dikena ngemujurka perambu tu enda ngira nya ari gerempung ukai dikuasa perintah (NGO), gempung bukai sereta orang ti gawa perintah.
“Program PTPN tu pelasar ari buah runding mensia mayuh mantaika isu ti bekaul enggau penyerakup pupu raban bansa enggau menua sereta baka ni chara dikena mutar penanggul ke bisi nekul.
“Nyadi timbal ari rayat bekaul enggau program Perambu Atur Penyerakup Menua PTPN tu deka diperati nengah program ke diatur ba selampur menua sepemanjai bulan Ogos enggau September tu” ku tandu Nyabong.
PTPN tu siti ari pengawa perintah dikena ngemujurka juluk menua deka meda rayat terus besaup enggau pangan diri.
Tu mega program ti patut dipejalai ba timpuh lima taun berengkah ba taun 2021 ngagai 2025 ila bepelasar Rukun Negara sereta program ti nyengkaum mutarka penanggul bekaul enggau pengelikun menua enggaika nyadi laya ba komuniti.
Nyabong mega madah pelin tu ngembuan lima juluk nyengkaum penyerakup chara baru idup begulai entara pangan diri, perintah enggau rayat ti mujur ba pengawa ngemansangka menua, rayat sama begempung ati nyaup perintah ngaduka pemansang menua, pengidup ti likun bebasaka pupu raban bansa ke bukai sereta rayat ti ngembuan tikas runding ti tinggi.
Program tu digulu raban KRT ari semua bagian ba Kapit enggau mujur diatur raban ari Opis Penyerakup Bansa Bagian Kapit.
Sama bisi datai, Pemesai Opis Penyerakup Raban Bansa Kapit, Jendri Mangku sereta pemesai opis perintah ke bukai.
