Penyiru komuniti Kpg Long Banyok dipuji, orang pemisi mantu diri serumah ke tusah

LONG LAMA: Adun Telang Usan Dennis Ngau muji inisiatif komuniti Kpg Long Banyok Baram ti mantu sida serumah ketegal Atur Tagang Pejalai (PKP).

Ku Dennis, iya pechayaka bantu nya ulih mantu ngelempungka tating penusah sida.

“Aku gaga enggau beterima kasih ke penyiru sida laban sama mantu orang ngena pemisi diri.

“Tu mih ulah enggau pengawa ke patut ditunda dalam komuniti kitai enggau nyadi chunto ngagai komuniti rumah panjai bukai,” tandu iya.

Kemari, Dennis ngabas raban konvoi entukar ti mai bantu pemakai ngambi disadung ngagai rumah panjai sebedau berangkat ngagai Long Banyok ari mengeri Miri.

“Maya penusah tu, semua kitai deka ngasaika pemanah enti sema bisi entara kitai datai mantu perintah ari ke mantaika sebana aja ketegal bantu diberi enda umbas.

“Enda ngira berapa mayuh pengawa dikereja perintah, semua nya nyangka enda umbas dikena nangkup peminta semua rayat,” ku iya nyemetak madah.

Terang Dennis, iya sedarka bantu pemakai ti dianjung ngagai rumah panjai sekumbang PKP Kedua enda umbas laban timpuh PKP dilanjar ngagai renggat ketiga.

Nitihka penerang, bantu pemakai ti beungkus RM4,000 nya asil ari pemeri komuniti Long Banyok ngambi disadung ngagai 78 buah ruang bilik ti suntuk pemakai ba genturung pendiau nya.

Suara Sarawak