Penyiru Sarawak dibasa dunya

MIRI: Palan Jelu Siga Semenggoh deka kelai besai ari dunya pengudah nerima Anugerah Penyulut Dagang Temuai Dunya 2020 ungkup kategori Program Dagang Temuai Meruan ke diatur ba Berlin, Jerman bulan baru nyin ila, ku Kepala Menteri Datuk Patinggi Abang Johari Tun Openg.

Kenu ku iya, anugerah nya mandangka kelai basa ngagai ejensi ke udah bebendar ngangkatka industri dagang temuai Sarawak.

“Aku berasai temegah laban anugerah nya mandangka pemujur Perintah Sarawak dalam nyaga pengidup jelu mayas.

“Reti nya dunya ngaku Sarawak nyadi sebengkah ari menua ti megai tanggungpengawa sereta siru enggau rampa menua.

“Pengawa meri basa tu mega deka ngangkatka Sarawak seikas enggau menua bukai ba serata dunya.

“Kitai ngarap rizab rampa menua ba Miri tu mega deka diaku nyadi rizab betikas dunya,” ku iya rambau Pengerami Bejadika ‘Love Hornbills Day 2020’ ba Rizab Tulen Piasau (PNR) ditu kemari.

Abang Johari mega bejadika pengawa nasih tanah ungkup projek ngaga Palan Tulen Nemu Pengeraja Asal di PNR.

Dulu ari nya, iya madahka penyampau belanja RM30 juta dikena ngemansangka palan nya.

Sama bisi datai Ketuai Pemesai Eksekutif Opis Kampung JSarawak (SFC) Haji Zolkilpli Mohamad Aton, Pengelicha Universiti Mahidol, Profesor Emeritus Dr Pilai Poonswad, Menteri Perengka Pengangkut Datuk Lee Kim Shin enggau bala bukai.

Taun 2015, SFC diberi tanggungpengawa ngintu sitak nya ke dikumbai Kem Piasau lalu digazet nyadi palan pengeraja asal kena 31 Disember 2013 enggau pemesai 93.5 hektar.

Tuju palan nya digazet laban nyadi sebengkah inisiatif Perintah Sarawak ti deka numbuhka enggau ngetanka penulen rampa menua gadung ba mengeri-mengeri di Sarawak lebih agi di Miri.

Suara Sarawak