Penyulut dijapai ari kerejasama semua

SARATOK: Kerejasama rat bala komuniti kelebih agi apai indai ba pengawa diatur piak sekula beguna amat nentuka pemujur bala anak kelimpah ulih ngangkatka nama sekula.

Ku Kaban Parlimen Saratok Ali Biju, pemujur enggau penyulut ulih dijapai enti bisi kaul pemereti ati entara apai indai enggau piak sekula.

“Kitai endang keran dekaka sekula di menua pesisir nyapai penyulut bepun ari pelajar ti ngayanka pengeransing sida nitihka singkang pemansang menua kemaya hari.

Ali mansutka jaku tu lebuh nyadi temuai dipebasa ba Pengerami Malam Main Asal enggau Seni Serakup Apai Indai enggau Pengajar (PIBG) Sekula Primari (SK) To’ Eman Nyabor ditu, kena malam Hari Enam nyin tadi.

Ba lansa bukai, Ali mega siruka peminta sekula dikena ngemujurka perambu aktiviti nyengkaum lumba enggau program bukai ngaul bala komuniti.

“Pemeri RM20,000 tu kelai sukung aku ngagai pengawa sekula enggau apai indai kelebih agi nyendiaka penyikap perengkaguna pemun ungkup pengelantang nembiak.

“Aku mega deka meri sagu ati penyampau RM300 siku ngagai dua iku nembiak ba sekula tu ti bulih 5A ba pemutus Ujian Penilaian Sekolah Rendah (UPSR) tu tadi.

“Kelimpah ari nya, di Saratok ditu bisi 11 iku nembiak bulih 6A ba UPSR lalu sida mega deka nerima pemeri RM500 siku nyadika peransang ngagai semua nembiak nyapai penyulut ba pelajar,” terang Ali.

Suara Sarawak