KUCHING: Sarawak Energy Berhad (SEB) udah nyapai penyulut ti ngemegahka lebuh dirikodka nyadi pemaju kuasa ti ulih dikemaru pemadu besai di Malaysia.
Tuai Pemesai Eksekutif SEB Datuk Sharbini Suhaili madahka, SEB udah berubah konsisten ari meri kuasa bepelasarka fosil ngagai kuasa hidro nyentuk diatu.
“Nengah sukung Perintah Nengeri, Sarawak diatu dulu ke mua ari sukut pemansang kuasa lama, berubah ari champur kuasa ti 100 peratus bepelasarka fosil ba taun 1920-an ngagai lebih ari 90 peratus kuasa api fosil ba taun 2010.
“Tang diatu, Sarawak udah beganti ngagai kuasa hidro ti ulih dikemaru,” ku iya.
Sharbini bejaku munyi nya ba Pengerami Sarawak Energy Centenary Townhall di Palan Aum Borneo Kuching (BCCK) ditu kemari.
Ku iya, pekara tu seriris enggau tuju ketujuh Pemansang Mendam Serakup Bansa Dunya (PBB) iya nya akses ngagai kuasa ti ulih diempu, ulih dipechaya enggau moden ungkup semua.
Iya nandu, SEB nyau deka ulih nyapai tagit sida iya nya meri kuasa karan penuh ngagai serata menua tu ba taun 2025.
“Ari pengkalan data, penyampau 84 iku peranak di selatan Sarawak ba taun 1920-an, diatu kami nyendiaka bekal kuasa karan ngagau 740,000 akaun, nyendiaka kuasa karan ngagai semak 3 juta peranak di Sarawak nyengkaum sida di Indonesia.
“Ukai nya aja, penyampau kuasa karan bagi menua pesisir mega nambah iya nya ari 56 peratus ba taun 2009 ngagai 96.5 peratus ba taun 2021,” ku iya.
Kelimpah ari nya, iya madahka Sarawak Energy endang konsisten di mua seriris enggau ubah kuasa dunya ti deka nyadi tiang besai pejalai penumbuh SEB.
Ku iya, SEB mega deka terus nyukung Agenda Kuasa Gadung Sarawak nengah pengawa ngubah kuasa seriris enggau Strategi Pemansang Pasca Covid-19 Sarawak nyapai status bepenatai pemisi tinggi ba taun 2030.
