Penyulut nyadi teladan

TAJA udah beganti taun lalu nyingkang ba taun 2020, mayuh kenang manis sepanjai taun 2019 meri besai reti ba pengidup kelebih agi mayuh pemujur sereta juluk ati udah dijapai ba taun nyin kemari.

Kenang manis tu suah nyadika peransang ngagai semua kitai ngambka ransing enggau liat ati ngereja pengawa lebih manah ari taun ke udah.

Baka nya mega utai diasai siku pengelicha ba Taylor’s University benama Serit Banyam ke nempa mayuh pemujur renggat menua enggau entarabansa.

Peranak asal Nanga Linsom, Ulu Layar Betong, Serit ngembuan pelajar tikas Master of Science (Human Communication) ari Universiti Putra Malaysia (UPM) dalam taun 2011.

Diatu, iya gawa nyadi siku pengelicha ba School of Liberal Arts and Sciences, Taylor’s University (Subang Jaya).

NEMPA PEMUJUR… Serit menang Oustanding e-Learning Project Award IUCEL 2019.

“Mayuh pemujur enggau penyulut ke udah dijapai aku nyadi siku pengelicha lalu sepanjai taun 2017 enggau 2018.

“Aku mega kala menang mayuh anugerah kenyau ari nyadi pengelicha ba palan pelajar tinggi nya,” ku iya bekunsika pengaga diri.

Kenang enggau pemujur tu patut nyadi peransang ngagai bala nembiak ti besekula awakka belajar bebendar sereta mujur ba pengidup enggau nyadi orang ke menyana dudi hari.

Berebak enggau nya, Serit mujur ngubah modul Hubungan Etnik ari belajar ba kelas ngagai belajar nengah online lebuh nempa chara belajar ke baru.

Modul Hubungan Etnik ti digaga Serit tu diaku nyadi chara belajar pemadu manah ba Taylor’s University ke alai modul dalam subjek nya digaga manah agi nentuka nembiak ulih ngasaika subjek dipelajar ba pengidup besehari-sehari.

PINTAR… Serit mega kala anugerah pemadu tinggi iya nya nyadi Finalis Qs-Wharton Reimagine Education Award 2018 ba ngagai San Francisco ngarika Malaysia ba renggat kepenudi.

Gaya belajarka subjek tu mega meransang bala nembiak rindu agi belajar nengah online kelimpah ngubah pekara pelajar ngambi bekualiti tinggi.

Chara belajar baru tu udah direjister ba reta intelek (LY2019004277) lalu dikena ba modul bukai baka Pengajian Malaysia ba renggat palan pelajar tinggi.

Serit mega kala dichiri Opis Palan Pelajar Tinggi nyadi panel ngagai 3 Kaban Komiti renggat nasional nyengkaum Service Learning Malaysia (SULAM) enggau MPU, nyadi akim ba pekit di Malaysia baka ECONDEV, IUCEL enggau pekit bukai.

Kelimpah nyadi akim, Serit mega nerima mayuh anugerah laban ransing nengkebang chara belajar nengah online baka Anugerah Produk E-Learning Pemadu Manah enggau Silver Award (Poster presentation) ungkup IUCEL 2019, Anugerah Presiden enggau Taylor’s Education Group (Ngajar enggau Belajar) ke alai anugerah tu pemadu tinggi ba renggat institusyen nya.

Nambahka nya, anugerah bukai ti diterima iya baka Silver Award, PICTL 2019 di University Putra Malaysia, siku ari penerima anugerah Most Inspirational ari Sugarbomb Perfumes, Anugerah Rokcy ari Maxxan Realty.

NGIRI PENEMU… Serit meri penerang ngagai bala pengelicha bekaul lebuh merambu Program SULAM ba palan pelajar tinggi sida.

Entara anugerah pemadu tinggi kala diterima iya nya kala nyadi Finalis Qs-Wharton Reimagine Education Award 2018 ke alai iya ngagai San Francisco ngarika Malaysia ba renggat kepenudi.

Anugerah tu datai ari Wharton Business School, University of Pennsylvania enggau anugerah pemadu tinggi laban ngubah pekara pelajar seikas entarabansa.

Serit mega kala mantaika keretas pansik ba Aum Besai Entarabansa baka ba Perak, Putrajaya, Serang, Bali Indonesia, Bangkok Thailang enggau Ho Chi Minh City kelimpah nyadi Menijar Projek ba Pengerami Nutup Gawai Kaamatan 2019 sereta begulai numbuhka Serakup Anak Borneo Semenanjung.

“Lebuh bejuraika keretas pansik, aku ngena peluang nya bekunsika peneleba, cherita nyadi siku pengelicha kelebih agi pasal chara belajar sereta perambu pekara pelajar enggau akademik ngagai dunya.

“Ba renggat palan pelajar tinggi, aku nyadi Ketuai ba Faculty of Social Sciences and Leisure Management E-Learning Taskforce.

“Penelaba diulih ari megai pangku pengawa tu nyadika chuan aku ngiga runding baru, nempa kereban sanding belajar baru,” ku Serit.

Nyadi siku Ketuai Projek, iya ngajar 14 staf akademik belajarka modul ti diubah nipakka chara belajar nengah online.

Projek tu udah nyapai pemujur lalu modul tu dilanchar ba semester Januari 2020.

Taja udah nempa mayuh pemujur, Serit nadai kala leju ngiri penemu ngagai orang bukai ngambi sama ngubah modul Hubungan Etnik enggau bala nembiak ulih belajar chara online.

Diatu, Serit nampung pelajar renggat PhD di Taylors University laban ngasaika diri agi suntuk penemu laban agi tubah penemu apin dipelajar taja udah nyadi pengelicha sereta menang mayuh anugerah.

Pengeransing Serit ngemansangka diri ari sukut pelajar patut nyadi teladan enggau peransang ngagai bala nembiak ke agi besekula ngambi enda mantul ngapa seagi bedau datai ba adan munyi ku sempama, tekura enda ngetu ngapa seagi bedau tepantup ba bandir.

Pekara pelajar tu siti ari chara kitai nyingkang sebaka enggau orang bukai setipak enggau arus pemansang dunya sereta ngubah pengidup diri enggau diri sebilik.

Nya alai, bala nembiak ke besekula patut belajar bebendar ngambi nyapai juluk ati diri lalu ulih duduk sama baruh enggau bediri sama peninggi baka orang bukai.

Suara Sarawak