KUCHING: Sepenyampau 408 orang gawa perintah ari 18 opis enggau ejensi Perintah Sarawak nerima Pingat Perkhidmatan Setia ba siti program ti diatur di Kunsil Nengeri (DUN) Sarawak ditu, malam kemari.
Pengawa nerima pingat nya dipenyadi Premier Sarawak, Datuk Patinggi Tan Sri Abang Johari Tun Openg.
Nya keterubah diatur ba taun 2026 dikena ngaku servis nyulut enggau penaluk sida ari ejensi perintah nengeri enggau Perintah Besai.
Sekeda tuai opis perintah nerima pingat iya nya Residen Bagi Menua Samarahan, Mohamad Irwan Bahari Bujang, Residen Bagi Menua Serian, Caroline Cleophas Joseph, Direktor Opis Vateriner Sarawak, Datuk Dr Adrian Susin Ambud sereta Direktor Opis Kereja Raya Sarawak, Datuk Dr Cassidy Morris.
Bela nerima pingat iya nya Direktor Opis Tanah enggau Survei Sarawak, Datuk Awang Zamhari Awang Mahmood, Direktor Opis Betanam Betupi Sarawak, Dominic Chunggat sereta Direktor Opis Pengintu Pengelantang Sarawak, Semawi Mohamad.
Pia mega, bisi sekeda penerima bukai bela dirami berindik ari penaluk sida gawa pengelama 39 taun ba sektor opis perintah nengeri.
Nya nyengkaum Iskandar Subeki ari Opis Tanah enggau Survei Sarawak, Davis Herould Awell, Johnny Wong sereta Abu Bakar Zaidel ti ngari ke Kaunsil Mengeri Padawan (MPP).
Bela nerima pingat iya nya Andy Christopher Goh enggau Tay Teck Sian ari Kaunsil Pengempung enggau Penyuman Tanah Sarawak sereta Lau Min Chu ari Opis Pengerai Nengeri Sarawak.
Pingat Perkhidmatan Setia siti inisiatif perintah ngaku jasa orang gawa perintah ti mandang komitmen tinggi lebuh bejalaika pangku pengawa sida ngagai rayat enggau nengeri Sarawak.
Bela datai, Speaker DUN Sarawak, Tan Sri Datuk Amar Mohamad Asfia Awang Nassar, Sekretari Perintah Sarawak, Datuk Amar Mohamad Abu Bakar Marzuki sereta Sapit Speaker DUN Sarawak, Datuk Idris Buang.
