KUCHING: Penyulut dijapai Sekula Sekondari (SMK) Bako ba pemutus Sijil Tinggi Persekolahan Malaysia (STPM) 2021 chukup ngemegah.
Adun Demak Laut Dr Hazland Abang Hipni madahka, pemujur nya dijapai ari kerejasama semua raban bekaul.
“Penyulut ti dijapai SMK Bako tu chukup ngemegahka laban tu asil ari kerejasama semua pengajar, pelajar, apai indai, raban tuai, Opis Pelajar Nengeri Sarawak enggau Opis Menteri Pelajar Malaysia.
“Pemujur tu mega asil perintah dalam ngemanahka tikas pelajar nengah program akademik, perengkaguna sekula enggau jaku peransang,” ku iya dalam siti penerang ensana.
Iya madahka, pemujur nembiak ba sekula nya deka nyadi chunto ngagai sekula bukai ba Dun Demak Laut dudi hari.
“Aku ngarapka pemujur SMK Bako tu ulih ditanka enggau diteruska awakka nyadi peransang ngagai sekula bukai,” ku iya.
Iya nangkan nya madahka, siku nembiak ‘Murid Berkeperluan Pendidikan Khas’ (MBPK) Nur Hamizah Mohd Fuzi udah nyapai penyulut teulihka PNGK 3.42 dalam kategori rabun.
Dulu ari nya, Direktor Opis Pelajar Nengeri Sarawak Datu Dr Azhar Ahmad mantaika pemutus sekula pemadu nyulut STPM 2021 iya nya SMK Bako Kuching, SMK Sacred Heart Sibu, SMK Batu Lintang Kuching, SMK Merbau Miri, SMK Sungai Merah Sibu, SMK Green Road Kuching, SMK Kampung Nangka Sibu, SMK Saribas Betong, SMK Tung Hua Sibu enggau SMK Asajaya Samarahan.
Ungkup rikod sepenyampau 5,769 chalun udah ngambi peresa STPM 2021 di serata Sarawak ari 81 buah palan berejister.
