Penyuntuk dua tukang urut OKU nerima perati SOGWA

SARATOK: Dua iku melaki bini ke gawa nyadi Tukang Urut ari Raban Nyelai Pendiau (OKU) udah nerima bantu ari Gerempung Pekereja Gis enggau Minyak Sarawak (SOGWA) kena 9 Februari tu tadi.

Chairman SOGWA, Jamal Abdullah madah bantu mata duit nya diberi pengudah macha berita bekaul enggau penusah ti ditapi Asui Muling, 39 taun enggau bini iya Diana Lai,33 taun ari surat kabar di menua tu apin lama ke udah.

“Nya alai aku pengawa tu nyadi peransang ngagai bala bukai bela mantu raban sida ke tusah baka seduai melaki bini lebih agi maya betapi enggau pandemik Covid-19 jam ke diatu.

“Tu mih maya kitai peranak menua mandangka penyiru enggau pengibuh ngagai raban OKU ti putus pengawa enggau penatai belanja ketegal Covid 19 tu.

“Aku mega minta raban bekaul datai ngabas sida ngambi nemu penyuntuk ke bisi ditapi sida,” ku iya madah ngagai Suara Sarawak.

Ungkup penemu, Asui enggau Diana tu sama enda meda dagang servis ngurut ke dipejalaika seduai melaki bini bisi tejanggal ketegal SOP Atur Mindah Betagang (PKP) ke agi dipejalaika perintah dikena nagang pengerekai Covid 19.

Suwa kedai alai seduai melaki bini bejalaika servis ngurut tu patut dibayar sepenyampau RM700 sebulan.

Urung 20 taun seduai udah bejalaika servis tu kelimpah ngandalka bantu ari Opis Pengintu Pendiau Raban Bansa (JKM) sepenyampau RM450 sebulan dikena ngidupka diri.

Sama bisi nyempulang pejalai Jamal Kaban Komiti (AJK Pengintu Pendiau) SOGWA, Jeffery Graman Nyambang.

Mensia mayuh ti bisi ati ngulur bantu belanja ngagai seduai melaki bini tau terus meri nuju akaun bank Asui Anak Muling ba Agro Bank (2006811000059666) tauka nuju akaun Bank Simpanan Nasional (BSN) bini iya benama Diana Lai (1310629000029971).

Suara Sarawak