Penyuntuk ini nupi dua iku uchu nerima perati Pedas

BINTULU: Penyuntuk belanja ketegal nadai orang enggau beridup ngasuh Aton Lagok, 70 taun, nadai daya nyengulaka dua iku uchu iya.

Nitih ku penerang diterima Serakup Dayak Sarawak (Pedas) Bintulu, Aton diau ba langkau seberai Rumah Sawing di Batu 23, Jalai Bintulu Miri ditu.

Kena 23 Ogos tu tadi, Pedas Bintulu bisi nerima berita pasal siku nembiak Primari Empat ba Sekula Primari (SK) Batu 18 Kalan Miri – Bintulu benama Merissa Mena Galam ti nerima pemeri pengasih ari bala pengajar enggau staf sekula nya dikena nampung belanja iya ti besekula baka tambang van, uniform sekula enggau belanja bukai.

“Merissa tu siku nembiak ti pandai ba pelajar enggau ngembuan rikod akademik manah amat.

“Taja pia, iya suah enda nurun ke sekula pengudah apai iya midang apin lama ke udah ketegal sakit seraya indai seduai lama udah enda begulai pengudah sarak suba.

“Iya enggau siku madi tuai, Patdrick Belikau Galam,13 taun, diatu diau sereta diibun ini seduai ti nadai kereja.

BERANDAU DALAM PETANG… Aton sebilik nunga bala kaban Pedas Bintulu ke bisi datai nganjung bantu seraya ngabas sida.

“Enti nitih Patdrick taun tu Pom Satu tang enda nampung pelajar iya ketegal penekul ba pekara belanja,” ku Marcus Sade ngarika Pedas Bintulu.

Nya alai ku Marcus, sida sebuat baum lalu setuju ngatur pejalai deka nukuka penerang diterima seraya ngabas sida Aton sebilik kena 27 Ogos.

Aton madahka diri kala minta rumah e-Kasih tang nyentuk sehari tu status peminta nya apin dikemendar lalu nadai sebarang rekod nerima Bantu Belanja Idup (BSH) 2019 naka diatu.

Iya mega madahka sida sebilik nadai kala nerima sebarang bantu ari opis enggau ejensi bekaul sereta gempung ukai dikuasa perintah bukai kelimpah ari bantu diterima Merissa ari bala pengajar enggau staf sekula.

Sinuka nasip sida Aton meuchu, Pedas Bintulu lalu bepupuka belanja ti dikearap ulih nyaup ngelempungka tating penusah sereta meri pengelantang.

UMANG… Aton meuchu ngenduh ari panas enggau ujan ba sebuah langkau seberai Rumah Sawing di Batu 23 Jalai Bintulu Miri ditu.

Kena 10 September tu tadi, Marcus sekali agi ngetuaika sida sebuat nganjung bantu kereban dikena besekula baka kereban tulis, kantung, kasut enggau uniform kelimpah bantu pemakai baka berau, mi, minyak makai enggau ai irup sereta ke bukai.

Nambahka nya, Merissa mega udah dipujur diau bemalam ba buding tang iya enggai, engka agi malu laban kala dikeduan bala bakih bukai.

Langkau nya mega nadai disikap ngena perengka guna pemun baka bekal ai beresi enggau kuasa karan. Sida sebilik semina ngandalka ai ti ditekat ari bukit enggau injin api enti bisi belanja lebih meli minyak tang suah agi betengau ngena kelita meri penampak.

Nya alai Pedas Bintulu ngarapka opis enggau ejensi bekaul besaup mutarka penanggul sida Aton sebilik nitihka pematut seraya minta kasih mensia mayuh bela gerah jari betulung.

SAUP KAMI… Kaban Pedas Bintulu bepupuka belanja mantu Aton sebilik.

 

Suara Sarawak