Penyuntuk siku OKU nerima perati Tim Projek Pensil

SRI AMAN: Pemerat tating pengidup ke diasai Stanley Awel, 52 taun matak penyiru enggau penyinu sebengkah gerempung ukai perintah (NGO) ditu iya nya Tim Projek Pensil.

Stanley ti mega timpang pendiau (OKU) kategori tubuh, idup ba sebuah langkau nyembuah ke digaga ba tanah sida semenua di Rumah Alex, Skim Melugu, Sri Aman.

Udah ke ninga berita Stanley, kaban gerempung diuluka Yen Jebeni terus datai ngesah nganjung bantu pemeri ari Norina Umoi Utot, pagi kemari.

Nitihka penerang, Stanley tu nadai orang enggau sebilik. Iya diau ba langkau ti dientak ba tanah sida semenua ti sinu meda iya.

SINU…Gaya langkau alai Stanley diau semina buan alai tinduk.

“Setaun sebedau tu, iya bisi rumah tang udah runtuh ngujungka iya udah nya enda meruan endur diau nyentuk bemalam ba sebelah tanah sebedau siku ari sida semenua nyanggup ngasuh tanah alai iya belangkau,” pia ku pengari gerempung nya madah, kemari.

Stanley mega dipadahka bisi nerima bantu Opis Pengintu Pengelantang (JKM) ngelama tu.

Bantu nya dikenchadika iya dikena ngidupka diri kelimpah bedua belanja dikena mupuk ngaga langkau baka ke endur iya diau diatu.

“Ketegal enda ulih nyeliah penyuntuk, iya enda meruan makai.

“Nya alai, enti orang sepiak iya makai, sida nya endang ngangau ke iya makai.

“Nadai endur iya nyumai, nadai dapur kelimpah ti suntuk belanja, “ku iya madah baru.

Kelimpah ti datai nganjung bantu sehari nya, gerempung tu mega deka ngiga turu ngambika bisi dikena nulung Stanley nangkan tu ila.

Ungkup penemu, penyauh Rumah Skim Melugu ari pasar Simanggang enti ngena entukuar kira 15 minit.

Kaban Projek Pensil ti sama nyereta pejalai ngabas Stanley iya nya Baharudin Karim.

Pengudah berita pasal penusah Stanley dibantai ba media rama kemari, mayuh penguna media rama ngenataika penyinu ati diri sereta madah diri kasih meda pengidup iya.

DATAI NGESAH…Yen (kanan) rambau nganjung bantu pemeri barang pemakai ngagai Stanley.