Perabung Opis Pelilih Bau tekabak dipangka biau balai

BAU: Penusah biau balai mangka pasar Bau lemai kemari ngujungka nyauka semua perabung begunan Opis Pelilih Baru tekabak.

Kenu ku Ketuai Opis Bomba enggau Penyah Penusah (BBP) Bau, Penulung Kanan Penguasa Bomba (PKPgB) Tawang Lingem, penusah nyadi urung pukul 6.30 lemai nya bepun ari kabut dientudika ujan bangat enggau kudi.

“Kitai berumban ngesah ngagai endur penusah nyadi pengudah nerima kangau ngenyit urung pukul 6.50 lemai nya.

“Kami betubuh semilan diketuaika PBKII Tiwi enggau kereban LFRT enggau EMRS kin lalu meda sebagi aria tap enggau perabung begunan nya udah tekabak lalu terebai ditabanka ribut.

“Sebagi ari perabung begunan besai opis nya udah ninggang begunan kedua ti besemak,” ku iya ba sebengkah penerang berita.

Ba penusah bukai BBP Bau mega nerima kangau madahka dua penusah kayu tumbang ba Jalai Seringgok enggau Jalai Kampung Buso Bau ketegal pemalat kabut ti mangka.

Nasip amat ku iya nadai sebarang bakal tauka bebadi nyawa dirikod ba kededua penusah nya.

Berebak enggau nya Raban Nyaga Pengelikun Mensia Mayuh Malaysia (APM) bela ngaul diri ba operasyen nya.

NYAUKA ABIS TEKABAK… Perabung Begunan Opis Pelilih Bau tekabak ketegal biau balai lemai kemari.

Suara Sarawak