LIMBANG: Pekit Bebatak Tali Antarabansa ti deka diatur kena 17 enggau 18 November ila di Limbang nyendia perais penyampau RM66,000.
ADUN Bukit Kota, Datuk Dr Abdul Rahman Ismail madah, pekit nya nyendia perais besai RM20,000 ungkup tim ti ngempu gelar champion sereta trofi kelimpah ngerebut Trofi Premier Sarawak, Datuk Patinggi Tan Sri Abang Johari Tun Openg.
Ku Abdul Rahman ke mega Sapit Menteri Industri Pemakai, Komoditi enggau Pemansang Wilayah Sarawak, pekit nya ulih ngelaku Limbang ti nyadi palan enggau kuasa lumba besai ukai semina di Sarawak tang mega ba tikas antarabansa.
“Pengudah tu kitai deka ngatur Pekit Bebatak Tali Renggat Antarabansa, nyadi tuju ngatur pekit renggat pelilih tauka bagi menua tu dikena meri awak ngagai mensia mayuh ti bisi minat tauka sida ti deka nguji lumba tu ngambi mayuh agi ulih masuk lumba tu,” ku iya.
Abdul Rahman nyebut pekara nya lebuh Bejadi Pekit Bebatak Tali Tetutup Limbang enggau Lawas 2023 ba Kompleks Lumba Limbang, empai lama.
Ku iya, sekeda tim ari luar Sarawak udah ngenukuka diri masuk pekit nya, baka ari Sabah, Semenanjung Malaysia, menua Brunei Darussalam enggau Kalimantan, Indonesia.
Ku Abdul Rahman agi, iya deka nambah fasiliti ti bisi ngambi Pelilih Limbang ulih nyadi nalan ngatur bemacham aktiviti lumba, main asal enggau ke bukai.
