Perais minta Bengkel Seri Sarawak diseruri nyadi palan Akademi OKU

KUCHING: Gerempung Anak Nyelai Pendiau Sarawak (Perais) merambu minta Opis Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit (KWKPK) nyeruri Bengkel Seri Sarawak ngambika ulih nyadi sebuah Akademi Orang Nyelai Pendiau (OKU) ba baruh opis menteri nya.
Presiden Perais Rapelson Richard Hamit madahka akademi nya ila mega patut dipujurka raban OKU empu kelimpah meri pengawa enggau ngelatih OKU nyadi raban pengajar.
“Pengajar OKU mega ulih nyendiaka kus vokasional, dagang enggau betanam betupi ti engkeman ngagai raban pelatih.
“Nya alai, Kompleks Latih OKU patut digaga seriris enggau tuju tu,” ku iya dalam siti penerang media sehari tu.
Tandu iya, diatu penatai pemisi semua pekereja ba Bengkel Seri Sarawak udah ba baruh tikas penyeranta.
“Bagi sida ti begaji hari deka dibayar RM15 sehari lalu sida ti begaji bulan semina urung RM300 ngagai RM600 sebulan.
“Enti KWKPK ngambi sereta nyeruri bangkel tu ila kami ngarapka pengelantang raban pekereja ba bengkel nya ulih dijaga baka diberi gaji minimum RM1,200 sebulan nyengkaum bulih insentif enggau perengkaguna khas,” ku iya.
Iya nyemetak madahka, perintah nengeri patut beratika pekara tu.
Berebak enggau nya, iya madahka Perais endang nerima manah perambu Menteri KWKPK Datuk Seri Fatimah Abdullah pasal penumbuh Palan Latih OKU deka digaga ba Sarawak dikena ngemuntangka raban nya nyambung sekula pengudah tembu peresa Sijil Pelajaran Malaysia (SPM), kemari.
Taja pia, naka diatu opis menteri tu bedau nyemetak nentuka penumbuh begunan nya nyadi sebuah kompleks latih OKU tauka sekula vokasional khas OKU.