Perais’ Taun Baru China di Spaoh

SPAOH: Pengerami Taun Baru China 2021 meri reti ke besai ngagai komuniti China ditu beduduk ari pengawa ngaga begunan Sekula Bansa China Perintah (C) Chung Hua udah dikemendar nengah agih belanja RM2 juta.

Sapit Kepala Menteri Sarawak, Datuk Amar Douglas Uggah Embas madah, projek nya baka perais taun baru China ungkup komuniti nya laban peminta projek nya udah dikemendarka Kepala Menteri Datuk Patinggi (DR) Abang Johari Tun Openg.

Iya madah munyi nya maya begulai enggau Ketuai Raban Bansa Enggau Ketuai Komuniti China Spaoh Ngintu Taun Baru China 2021 nengah aplikasyen Zoom kena Hari Enam tu tadi.

Berebak enggau nya, Kaban Parlimen Betong Datuk Robert Lawson Chuat mega bisi ngambi bagi ba pengawa ngintu Taun Baru China nengah chara baru nya.

Nangkan ke nya, Datuk Amar Douglas Uggah mega bisi ngelansa pasal Projek Pemansang Bukai ba Spaoh nyengkaum Projek Ngaga Padang Bilun Mit (STOLPORT) diatu baru tembu ba proses tinda.

Ku iya, Jematan Baru Tanjung Sebekut ditu mega diatu benung dalam proses tinda kelimpah peminta ngaga klinik pengerai ke baru di Spaoh.

Udah nya, ba bidang betanam betupi, iya madah betanam betupi ngena chara moden udah diperambu lalu begunaka sukung ari komuniti ba sitak nya empu. -Ukas

Datuk Amar Douglas Uggah ngintu pengerami Taun Baru China enggau Ketuai Raban Bansa Enggau Ketuai Komuniti China Spaoh Ngintu Taun Baru China 2021 nengah aplikasyen Zoom kena Hari Enam tu tadi. -Gambar Ukas