KUALA LUMPUR: Perintah Penyerakup meseti merambu manah pengawa nambahka penyampau tubuh raban indu nitih pekara undang-undang, pengelantang enggau pengelikun indu ngambi ulih dibagi sebela enggau lurus ati.
Menteri Pemansang Indu, Nembiak Mit Enggau Pengelantang Komuniti ti mega Tuai Indu Gempung Parti Sarawak (GPS), Datuk Seri Fatimah Abdullah madah, orang patut sedar sereta ngaku raban indu nyadi tulang belakang dalam parti enggau politik menua.
“Ngarika Indu GPS, aku ngambi peluang tu bekunsi aspirasyen iya nya deka mantu enggau mantu rayat (To Give Back the Best To Society), awak raban indu mega ulih ngasaika asil merdeka enggau empas pemansang ekonomi ti meruan.
“Dikena nyapai aspirasyen tu sekeda pekara besai dikemerat Indu GPS iya nya nentuka penanggul, ekuiti enggau kualiti pelajar mungkur semua enggau begulai ngambi nadai siku rayat dikelaung enggau tinggal.
Fatimah bejaku munyi nya lebuh meri jaku beserimbai Konvensyen Indu Perintah Penyerakup di Balai Merdeka, World Trade Centre Kuala Lumpur ditu, kemari.
Ku iya, kelimpah ari nya, sida mega ngerembaika peluang enggau kaul dalam ekonomi enggau dagang ngambi indu ulih begulai mantu bekaul pengelantang diri, ruang bilik enggau pemanah Sarawak.
