ARTIKEL

Perambu muka UTC Kota Samarahan udah dikemendar

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

BEJADI…Datuk Rubiah Wang (tiga ari kanan) nyuaka tambai menua Malaysia ngagai sekeda ejensi perintah kelai bejadika program nya.

KOTA SAMARAHAN: Palan Transformasyen Mengeri (UTC) pampang Kota Samarahan diperambu deka dibuka ba The Summer Shopping Mall.

Pekara tu ditesau Kaban Parlimen Kota Samarahan, Datuk Rubiah Wang lebuh bejadika pengawa ngelepaska Konvoi Asajayakusayang ba palan lapang Surau Darul Jannah, Tambirat Hilir kilah ensana.

Ku Rubiah, perambu ngaga UTC pampang Kota Samarahan tu udah dikemendarka perintah menua tu lalu dipelabaka deka dibuka ba The Summer Shopping Mall ditu.

“Taja pia, naka diatu, pengawa ngaga palan tu ditu agi nganti penerang silik ari Opis Menteri Pekara Wang Menua Malaysia (MOF).

“Pekara tu siti ari berita manah ungkup rayat ba kandang menua Kota Samarahan, Serian sereta sekeda kandang endur ke ngelingi tu.

“Aku ngarapka nengah pengawa numbuhka palan tu ditu ulih meri penyamai ngagai rayat ke ngelingi menua tu ti deka ngaduka pengawa sida bekaul enggau ejensi perintah.

“Sida mega enda ibuh kiruh berebut ngelawa palan ke sebaka ba tengah pasar din,” ku padah Rubiah.

Sepenyampau 16 buah entukar ari mayuh bengkah opis enggau ejensi perintah ngambi bagi ba konvoi tu beserimbai enggau pengawa ngintu bulan merdeka taun tu.

Konvoi tu diatur begulai Opis Pemadah (JaPen) Pelilih Kota Samarahan, Opis Pelilih Asajaya enggau Palan Servis Parlimen Kota Samarahan ti bepelasarka rambai jaku Merdeka Pertahankan.

Rubiah madah, konvoi tu siti ari inisiatif perintah menua tu kena nerenak semangat talukka menua ngagai rayat kelebih agi nembiak rebak baru.

“Penyedar senentang semengat talukka menua tu endang patut ditanam dalam ati nembiak rebak dudi ke deka nyadi tuai megai menua tu ba maya ti deka datai ila,” ku padah iya.

Konvoi tu bepun ba Surau Darul Jannah urung pukul 9.30 pagi lalu nuju ngagai Kampung Tambirat lalu mansa pasar Asajaya sebedau diketuka ba Opis Pelilih Asajaya urung pukul 10 pagi.

Iya mega madah, sekeda program bukai ti deka diatur beserimbai enggau bulan merdeka tu nyengkaum Konvoi Hari Merdeka Renggat Menua Sarawak ti deka mansa pelilih Kota Samarahan enggau Asajaya.

BERITA LAIN

BERITA TERBARU