Peranak Kpg Boyan meseti kreatif ngasilka produk narit temuai

KUCHING: Kampung Boyan bisi pengelebih kediri empu laban suah ditapatka temuai ti rindu meli kek lapis Sarawak.

Menteri Muda Utiliti (Bekal Ai) Datuk Dr Abdul Rahman Junaidi madah, pengelebih tu ulih meri peluang ngagai peranak dia nambahka penatai pemisi sida.

Taja pia ku iya, pengawa narit temuai ngagai Kampung Boyan meseti ngembuan mayuh pemansut nyengkaum daya idup, chalet enggau aktiviti ngaul komuniti.

“Genturung pendiau kitai tu endang bisi pengelebih enggau suah ditapatka bala temuai lebuh sida deka meli kek lapis kitu.

“Peranak ditu meseti kreatif agi kelebih agi ngasilka produk ti nyelai enggau ngatur mayuh agi aktiviti main asal enggau komuniti.

“Pematak tu beguna amat ngambi ulih nambahka penatai bala temuai ngagai sebengkah endur,” terang iya.

Rahman mansutka jaku nya lebuh nyuaka bangku enggau mija ungkup Surau Raudzatussalihin Kampung Boyan ditu, kemari.

Dr Abdul Rahman ti mega Menteri Muda ba Opis Kepala Menteri (Pekara Islam enggau DBKU) madah, Komiti Pemansang enggau Pengelikun Genturung Pendiau (JKKK) Kampung Boyan patut berandau enggau komuniti dia ngambi bejalaika projek pemansang ungkup sitak sida.

“Pengawa berunding enggau komuniti dia beguna amat ngambika perengkaguna ti diguna rayat ulih disedia,” ku iya.

Suara Sarawak