ARTIKEL

Peranak Long Busang minta bantu ngiga taba baru endur berumah

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KAPIT: Peranak Long Busang ditu minta lalu ngarapka raban ti bekaul ulih nyaup sida ngaga palan tauka taba alai berumah baru dikena nyeliahka diri ari suah dituntung penusah ampuh ai bah.

Penghulu Long Busang, Robinson Oso Lawai, 52 taun madahka pekara tu patut diperundingka raban bekaul enggau lengkas ngambi lalu ngichaka peranak di Long Busang ditu badu agi betapi enggau pengerugi besai pengudah semua reta tengkira sida ampuh bepun ari penusah bah ti suah nyadi sebedau tu lalu iyaka pemadu baru iya nya kenaka dini hari 2 Oktober tu tadi.

“Kami ditu chukup ngarapka raban bekaul ulih mantu kami ari sukut nyendiaka palan tauka taba alai berumah baru ti likun agi ari diatu.

“Rampa menua ti bebukit ngelingi genturung pendiau di Long Busang ditu balat meri penanggul ngagai peranak menua ti deka begagaka rumah baru,” ku iya madah lebuh dirandau Ruai, Suara Sarawak lemai ensana.

Nambah nya, ku iya, bantu ungkup nyendiaka taba berumah baru pemadu iya beguna agi ba jam kediatu ngelui ari bantu tumu baka bantu bekal barang pemakai ti diterima sida sebuat ari raban bekaul maya penusah bah nyadi.

BERIPAI…Peranak Long Busang beripai meresi laman rumah ke mayuh lichak bekau ampuh bah pengudah ai surut.

“Ukai enda beterima kasih ke bantu bekal pemakai enggau tulung bukai sekumbang penusah tu (bah) nyadi.

“Tang, ba penemu aku nyema bisi orang deka mantu nyungkur tanah alai kami sebuat ditu berumah baru nya lebih manah.

“Tambah mega, tulung ari sukut barang pemakai tu semina sempama baka kitai ti makai ubat pemenat.

“Pengudah abis penat ari ubat diempa nya, dia dih kitai deka belabuh ngasaika baru pemedis nya tadi.

“Nya alai, aku minta kasih enggau enda ngira sesapa lebih agi nuju raban bekaul, bantu mih kami ditu nengah chara nyendiaka palan alai kami pindah berumah baru,” ku iya.

Agi bekaul enggau pekara ti sama, siku peranak Long Busang benama Rafeah binti Abdullah @ Elim Bilong, madahka iya balat bendar napi pengerugi ketegal mayuh barang dalam rumah iya enda mujur diselamatka maya penusah nyadi.

“Nadai nemu bejaku agi, ketegal ari penusah bah ti datai nuntung kami deditu.

“Mayuh reta tengkira kami ditu enda mujur diselamatka baka entukar, injin api (genset) kelimpah barang bukai baka kereban diguna ninting hari enggau barang pemakai.

“Minta kitai sama besampi ngagai petara ngambika tikas ai tu enda agi nambah lalu kami mega ulih diau enggau likun,” ku iya.

Ambika rikod, penusah ai bah ti nyadi ba Long Busang kenaka pagi 2 October 2021 tu tadi iya nya iyaka lumur dua pemadu besai nyadi pengudah penusah ti sama ba taun 2018 suba.

Ungkup rikod, Long Busang udah betapi enggau penusah ampuh bah empat kali dalam kandang setaun tu aja iya nya sebengkah genturung pendiau ba ba sitak Hulu Balui Bukit Mabong di Kapit nyengkaum Long Unai, Sang Anau enggau Long Singut tu sebengkah genturung pendiau diuan bansa Kenyah baruh pegai Parlimen Hulu Rajang enggau Dun Belaga.

BERITA LAIN

Pengelanchar kuasa karan sepanjai Sukma dijaga

KUCHING: Opis Menteri Utiliti enggau Telekomunikasyen deka nentu bekal kuasa karan sepanjai Lumba Malaysia (Sukma) XXI 2024 ti deka diatur ba Sarawak lanchar. Sapit Menteri

BERITA TERBARU