Peranak Rh Ganya enggau Rh Andau nerima projek MRP

SARATOK: Peminta rayat deka semampai didinga lalu nyadi fokus besai maya bejalaika pengawa nyadi pengari rayat.

Sapit Menteri Pengeluar Kuasa enggau Pengeraja Asal, Datuk Ali Biju madah, dipilih nyadi siku Kaban Parlimen enggau Adun nya mai tanggung pengawa chukup besai.

Ku iya, peminta rayat enda tau enda ditangkup enggaika sida lebu ngapa udah milih enggau andalka kitai mai projek pemansang ngagai sida.

“Baka pengawa sehari tu, kitai nangkup peminta ari Tuai Rumah Ganya empu nengah Komiti Pemansang enggau Pengelikun Genturung Pendiau (JKKK) sida minta set kipas siling.

“Kitai mega udah ngagihka siti set kipas siling sepintu ngagai sida serumah ke bisi 38 pintu bilik betampung,” terang iya.

Jaku Ali nya dipansutka Walter Changgai ti ngarika iya lebuh nyuaka set kipas siling ngagai JKKK Rumah Ganya, Nanga Lempa Kabo ditu, ensanus.

Iya madah, projek ungkup pemansang rayat nya dipejalai nengah agih belanja Projek Mesra Rakyat (PMR).

Nambahka nya ku Ali, peranak Rumah Andau, Sungai Bangkong di Kabo mega bisi nerima 590 kepin dik (siling) enggau 13 tung chat ai (18 liter setung).

Berita penuh Ruai 6 pagila

Suara Sarawak