Peranak Rh Lichong pindah ke rumah baru nitih adat lama

MURUM: Peranak rumah panjai, Rumah Lichong, berasai gaga sepengudah pindah ngagai rumah baru sida urung pukul 12 tengah malam ensana.

Tuai Rumah (TR) Lichong madah sida pindah maya jam 12 tengah malam nya nitihka pengarap lama bansa Iban laban nangi sereta enggai ke sida ninga burung ke enda manah lebuh sida pindah ke rumah baru.

“Kami bejalai beraban pindah ke rumah baru kitu sepenyauh 1 Kilometer lalu lebuh kami ke bejalai di diumba enggau munyi gendang enggau munyi palu tawak,” ku iya.

Lichong bejaku ba Program Santai-Santai sepengudah sida pindah ngagai rumah panjai baru nya.

Rumah panjai baru sida Lichong sepemanjai 33 pintu ngena chuan rumah panjai moden digaga kenyau ari taun 2017 suba.

“Rumah panjai lama sigi enda dibuai tauka direrak kami laban dudi ari ila deka digaga nyadi rumah temuai ti deka nemuai sereta ngasai ke pengidup enggau pendiau kitai Iban di rumah panjai,” ku iya.

Berebak enggau nya Lichong madahka rumah panjai sida jampat tembu lalu ulih endur diau ketegal bantu ari perintah menua di betuai ke Gempung Parti Sarawak (GPS).

“Kebuah pia kami ngaga rumah tu ari lon iya nya bisi RM15,000 sepintu lalu semua mungkur RM495,000”.

“Semua tu nyadi nyata ketegal tulung sereta sukung ari Kaban Kunsil Nengeri (Adun) Murum, Kennedy Chuk Pai Ugon ke berandau enggau piak HDC,” ku iya.

Kelimpah ari nya, Lichong ngenatai ke pengaga ati ketegal sukung enggau bantu ari rayat rumah panjai iya empu nyengkaum kompeni ladang iya nya Ladang Keresa ke besemak enggau rumah panjai nya.

Suara Sarawak