SIBU: Rayat sitak Selangau dipinta enda kelalu bepanggai ba pengawa nanam sawit aja.

Kaban Parlimen Selangau Edwin Banta madah, rayat patut nguji nanam utai baru ti muntang agi enggau bisi peminta tinggi ba makit.

Iya keran deka meda pengawa nanam kopi ba Selangau ti meri chara bukai ngagai peranak nyungkak ekonomi kelimpah ari sawit.

“Aku apin lama bisi berandau enggau sebuah serikat pengeluar kopi ari Kuching. Serikat nya bekerejasama enggau Gerempung Peladang.

“Sida deka meri paung kopi, sum enggau ngajar chara nanam kopi. Enti udah mansutka asil dalam tiga ke empat taun, buah kopi nya ulih dijual ngagai sida,” terang iya.

Edwin bejaku munyi nya rambau Pengerami Makai Lemai Begulai Raban PBB Pampang Tamin ditu malam kemari.

Ku iya, diatu peminta kopi tinggi laban peminta makit produk nya chukup besai.

Iya madah, serikat nya begunaka 15 matrik tan kopi sebulan dikena nangkup peminta makit luar enggau menua tu empu.