Peranak Subis agi mimit ngerejister diri betuchuk vaksin

MIRI: Semina 4,596 iku tauka 26.9 peratus komuniti ba Pelilih Subis udah rejister aplikasyen MySejahtera lalu rejister nerima vaksin Covid-19, naka 23 March tu tadi.

Kaunsil Pelilih Subis ba sebengkah penerang minta komuniti ba Pelilih Subis ngembuan aplikasyen MySejahtera enggau lengkas baka ti udah dipadah perintah.

“Peranak ba Pelilih Subis dipinta rejister aplikasyen MySejahtera enggau lengkas lalu rejister diri nyadi penerima vaksin Covid-19. 

“Kami andalka peranak ditu deka meri kerejasama penuh ungkup pengelantang semua,” ku penerang ari Kaunsil Pelilih Subis nya.

Nambahka nya, penyampau sida ti rejister Mysejahtera deka nambah enti semua komuniti ba Pelilih Subis meri kerejasama.

Pengawa rejister MySejahtera beguna amat laban Program Betuchuk Vaksin Renggat Kedua enggau Ketiga deka berengkah dipejalai kena bulan April tu.

“Mensia mayuh dipinta rejister nerima vaksin enggau lengkas nengah aplikasyen MySejahtera laban pengawa betuchuk vaksin Covid-19 renggat kedua enggau ketiga deka dipejalai enda lama lagi.

“Pia mega, tu nentuka sida enda tinggal ari nerima vaksin tu,” ku penerang nya.
Mensia mayuh mega dipinta seruran bejimat enggau nitihka Atur Pengawa Standard (SOP) ti udah ditetapka dikena nagang pengerekai Covid-19.

Penerang silik tauka tanya bukai tau telefon ngagai Opis Pelilih Subis ba lumur, 085-719002.

Suara Sarawak