Peranak tasah bah di Belaga dibantu

MIRI: Tating penusah ditapi peranak ari dua buah genturung pendiau di Pelilih Belaga ditu ngulihka bekal pemakai pengudah tepekul ketegal ujan bangat diatu bisi berasai lempung berindik ari penatai bantu bekal pemakai kena 8 enggau 9 Jun tu tadi.

Sepenyampau 183 iku sida ti tasah bah ari 58 buah ruang bilik ti diau di Uma Penan Long Kajang enggau Uma Penan Long Abit nerima bantu bekal ti dianjung kia.

Sekretariat Komiti Pemutar Penusah Ngenyit Nengeri Sarawak (JPBNS) Mejar Ismail Mahedin madah, operasyen nganjung bekal pemakai dipejalaika raban ari Opis Pelilih Belaga, Raban Nyaga Pengelikun Mensia Mayuh Malaysia (APM) enggau Opis Pengintu Pengelantang Mensia Mayuh (JKM).

“Ujan bangat kenyau ari 4 ngagai 6 Jun ngujungka dua buah genturung pendiau tepekul ari dunya luar.

“Pengawa nganjung bantu bekenaka perau laban genturung pendiau ti dituntung penusah ba tanah seberai enggau ili sungai,” ku iya nerang.

Sida sebuat mujur ngenataika diri enggau likun di Long Kajang urung pukul 5.30 lemai kena 8 Jun tu tadi.

Kelai pengawa nyuaka bantu di Uma Penan Long Kajang udah diatur kena 8 Jun seraya Uma Penan Long Abit dikemujur 9 Jun.

Adun Murum Kennedy Chuk Pai Ugon dipebasa nyuaka bantu ti bisi nyempulang pejalai nya.

BESAUP… Raban nganjung bantu benung kiruh berangkutka barang ungkup peranak Uma Penan Long Kajang enggau Uma Penan Long Abit.

 

ENDA NEKUL… Perau enggau jalai sungai entara pemar ditapi raban nganjung bantu ngagai peranak Uma Penan Long Kajang enggau Uma Penan Long Abit ti tasah bah.