SEMATAN: Bemacham pekara udah diatur komuniti Telok Melano dikena ngambat penatai Yang Di-Pertuan Agong Al-Sultan Abdullah Riayatuddin Al-Mustafa Billah Shah enggau bini iya, Raja Permaisuri Agong Tunku Azizah Aminah Maimunah Iskandariah kena 13 September tu (Hari Tiga).
Berengkah ari jalai keliling tama ngagai tebing tasik nya, tisi jalai diias ngena tambai Malaysia enggau tambai Sarawak dikena ngambat penemuai keterubah sepasang diraja ngagai 0 kilometer Jalai Besai Pan Borneo nya.
Papan tanda selamat datai ngagai tebing tasik nya mega udah diganti baru ti nyadi sebengkah ari inisiatif dikena ngemanahka agi palan nya.
Pia mega, kanopi ungkup panggau besai dikena ngambat penatai Agong benung disikap ngambi bisi dikena ba hari bulan nya ila.
Nambahka nya, peranak lokal ti bedaja ditu berengkah gagit ninga berita nya laban penemuai sepasang diraja nya ulih ngerichah sereta meri seput baru ngagai gaya ba Telok Melano dia.
Kembara Kenali Borneo ti berengkah ari Tawau, Sabah nyentuk ke Telok Melano, Sarawak enggau penyauh pejalai 2,154 kilometer nengah Jalai Besai Pan Borneo ti nyambung Sabah, Sarawak enggau Brunei.
Berengkah ari 3 nyentuk 13 September tu, pejalai nya deka nyadi siti kenang berega ngagai peranak Borneo pengudah digaul Agong.
Sebedau tu, iya kala mansutka niat deka nguji penyamai pemakai lokal ba Sabah enggau Sarawak.
Kelimpah ari nya, iya deka ngasaika peneleba deriba entukar kediri empu neresa Jalai Besai Pan Borneo baka dipadah Al-Sultan Abdullah rambau bejadi Aum Parlimen ba bulan Februari taun tu.
