Peransang ari kaban chukup beguna maya dituntung penusah

Pemedis ke diasai lebuh ditan ba sepital pengelama 14 hari ketegal ditukuka positif Covid-19 siti peneleba ti enda ulih lenyau ari pengingat siku penanyi Iban, Daisy Wilbert Dennis, 32 taun tauka lebih dikelala enggau nama BabyDaisy.

Peranak asal ari Gran, Stumbin Sri Aman tu dituku kena rampit Covid-19 kena lemai 8 Januari pengudah diperesa Swab kena 7 Januari 2021.

Artis ke dibaruh perabung Panggau Buluh Pengerindu (PBP) ti bepalan di Miri tu dikelala landik nyadaka lagu rentak Pop Dangdut sereta kala mansutka sebuah album solo Baby Daisy Teguran Keran ba taun 2012.

Ngelansa pasal penguji ke pemadu baru ditapi ba pengidup Baby, dia Suara Sarawak bisi ngerandau lalu minta Baby bekunsika pengasai ati kenyau ditukuka kena rampit penyakit Covid-19 sereta pengelama iya diperubat nyentuk ke iya gerai baka selama.

“Aku ditemu positif pengudah diperesa (Swab Test) dipejalaika raban sepital laban aku deka beputung dikena muai darah meku ba kaki sepiak kiba.

BABYDAISY…Maya dipasuk berubat ba Sepital KLSMC.

“Tu mih penguji ti chukup besai ari semua penguji ke udah diasaika dalam pengidup aku ngelama tu.

“Bula madah enda kesal sereta ‘temati kutu’ lebuh nerima pemutus peresa Swab Test ti madahka diri udah kena rampit Covid-19.

“Ukai bebula, asai ke deka runtuh tungkul ati maya nerima berita diri empu positif Covid -19,”ku iya nusui pengasai ati diri maya keterubah nemu diri kena rampit Covid-19 ngagai Suara Sarawak, apin lama.

Baby diatu benung gawa nyadi Indu Misi ba Sepital Kuala Lumpur Sports Medicine Centre (KLSMC) madahka diri nadai ngembuan sebarang kelai kena rampit Covid-19 sebedau nya.

“Mimit pan aku nadai ngadang diri bisi kena rampit penyakit tu, laban aku nadai ngembuan sebarang kelai baka pedis rekung, tabin, nyawa enggai makai, idung berai tauka sebarang kelai bukai ti mandangka baka orang ke udah kena rampit.

SESAIS…Baby Daisy maya nerima servis ‘Physiotherapy’ ari pakar ba KLSMC pengudah beputung.

“Pesan aku nuju semua peminat ti dikesayauka aku enggau mensia mayuh ba luar dedin, anang enda ngemeratka pengerai diri, terus titihka Atur Pengawa Standard (SOP) baka nyaga takah maya betemu tauka berandau enggau orang bukai.

“Enggau peluang tu, aku minta mensia mayuh enti ulih beri mih jaku peransang ngagai bala pesakit Covid 19 tu awakka sida enda lemi semengat napi penguji laban penyakit tu bisi dedini, ukai utai dipinta nyadi nuntung siku-siku kitai.

“Aku pechaya nadai siku kitai minta pekara baka tu nuntung. Aram sama mih kitai besampi minta Tuhan seruran ngemata lalu merekat kitai dalam semua pengawa sereta bekerejasama ngelaban ‘munsuh’ ke enda ulih dipeda,”ku iya.

Berita manah diatu, Baby udah dikemendar pansut ari sepital KLSMC sereta udah mujur beputung muai darah meku ba tumbit kaki lalu ditukuka gerai ari dirampit Covid 19.

“Aku udah dipadahka udah suman sereta dikemendarka pansut ari sepital kena 28 Januari tu tadi iya nya pengudah diperubat pengelama 33 hari ba sepital ke alai empu gawa iya nya KLSMC,” ku iya.

SUKUNG ARI KABAN…Simran Kaur (kiba) bakih serumah sama gawa bebansa Punjabi ari Ipoh,Perak ti seruran meri jaku peransang ngagai Baby ngambika terus kering napi penguji.

Suara Sarawak