Peransang nyambung pelajar tinggi

Perambu Perintah Sarawak ti deka beratika sereta mantu ngelempungka tating belanja anak Sarawak ti tusah mayar pinjau Opis Wang Turu Pelajar Tinggi Nasional (PTPTN). Langgur penemu tu nerima timbal ti manah ari mensia mayuh.


Chela Nuri Michael, 24 taun.

“Nyadi siku ari nembiak ti belajar ba universiti, aku sigi nyukung penemu tu ngambika ulih nyaup anak Sarawak enda nanggi nyambung pelajar ngagai tikas pelajar tinggi perintah tauka peribit. Kelimpah PTPTN, perintah mega tau nambahka bantu bukai baka Sekularship Perintah Nengeri Sarawak (BPKNS), Sekularship ari Mara enggau ke bukai awakka anak Sarawak nadai utang lebuh sida ngepunka pengidup pengudah tembu sekula.”


Stanley Abang, 42 taun

“Ba penemu aku, perambu tu endang manah bendar laban ulih ngelempungka tating belanja ngagai sida ti mayar pinjau ninting bulan ke alai gaji sida ulih dikena beridup. Mayuh agi sida ke baru tembu belajar ba palan pelajar tinggi bedau tentu bulih kereja ti meruan tauka makai gaji ke besai. Bantu ari perintah nya mega ulih meransang bala nembiak belajar ngagai tikas ke tinggi agi laban nadai berutang ba PTPTN lalu duit ke patut dikena sida mayar PTPTN nya tau diguna dikena sida nampung pelajar ngagai tikas ti tinggi agi”.


Fabian Peter, 33 taun.

“Enti ulih 100 peratus PTPTN ditanggung perintah ngambika bala nembiak nyamai agi masuk universiti. Diskaun sepuluh peratus patut diteruska laban danji ba menifesto perintah besai ti deka nginsilka pinjau PTPTN udah enda amat. Mayuh nembiak ti tama universiti datai ari anak orang bekebun sereta bumai ti mimit penatai pemisi. Lebuh sida tembu sekula bisi sekeda laun bulih pengawa ti ngujungka sida enda tebayar ke utang. Nya alai aku andalka perintah nyukung sereta mantu sida tu”.


Erdy Izwan S, 32

“Tu siti ari bantu ti pemadu manah nuju bala nembiak di Sarawak. Kebuah pia, laban dunya jeman diatu begunaka pelajar. Ari sekula, gawa enggau dagang semua tu begunaka pelajar. Lebuh perintah deka mantu mayar PTPTN tu tau bendar meransang bala nembiak masuk universiti laban penanggul utang udah abis belajar tentu teputar. Nya tau meri penguntung ngagai Sarawak laban mayuh ngembuan nembiak enggau pengereja pengawa ke bisi pemandai ngambika ulih sama nyungkak ekonomi menua tu”.