Peransang rebak baru belajarka Sains

KOTA SAMARAHAN: Program Scienceploration Camp 2020 meransang mayuh agi rebak biak ngaul diri ba pengawa Sains, ku Prof Dr. Ahmad Hata Rasit.

Sapit Mandal Canselor Akademik dan Antarabangsa madah, nadai mayuh nembiak ke datai ari menua ulu enggau menua pesisir Sarawak tama Program Sains di Unimas laban sida rindu agi ke Program Kemanusiaan.

“Baka ditemu semua, kitai nguji meransang bala nembiak ngambi kus perubat, injinir tauka program bepelasarka sains tang pekara tu mar dijapai.

“Semina 19 peratus aja sida rejister ba Program Sains lalu ke bukai Program Kemanusiaan,” ku iya.

Hata mansutka jaku nya lebuh bejaku sereta bejadika Pengawa Ngelancharka Program Scienceploration Camp 2020 ba Dewan Seminar, Pusat Islam Tun Abang Salahuddin Unimas ditu tadi.

Ku iya, program nya beguna amat ngagai bala penyereta laban ulih nerenak ulah rindu sereta matak sida rejister ba Program Sains.

“Kebuah pia laban kitai begunaka mayuh agi nembiak ngambi Program Sains ukai semina ba sekula aja tang mega ba Unimas.

“Enti kitai bisi abis nadai 50 peratus rejister rebak biak ba Program Sains, kitai ulih meda pengidup sida tu menyana agi dudi hari,” terang iya.

Iya madahka sida ukai ngumbai Program Kemanusiaan nya enda beguna tang kededua program tu patut sebela.

Suara Sarawak