SIBU: Kes denggi ba Bagi Menua Sibu udah nurun 39 peratus taun tu.
Pemesai Pengerai Bagi Menua Sibu, Dr Teh Jo Hun ngenukuka pekara nya lebuh dirandau pemberita, ditu kemari.
Nya kebuah, iya ngelalau mensia mayuh seruran nyaga pemeresi ba kandang rumah sida.
Ku Dr Teh, semina 171 kes dirikodka ba timpuh entara 1 Januari ngagai 14 November tu tadi dibanding 280 kes ba timpuh ti sebaka taun nyin kemari (2019).
“Taja kes tu nurun 39 peratus, tang mensia mayuh dilalau mesti nyaga pemeresi rumah,” ku Dr Teh.
Dr Teh madahka kes tu nurun ketegal mensia mayuh kurang ngereja pengawa ba luar lebuh Atur Mindah Betagang (PKP) ti diteritka perintah kenyau ari bulan March tu tadi ngambi nagang pengerekai Covid-19.
“Ketegal PKP, mensia mayuh diau ba rumah aja lalu suah agi ngupas kandang rumah sida.
Lebuh ditanya pasal kes mayuh nyadi ba genturung pendiau di mengeri, Dr The madahka aedes tu nadai milih endur sekalika ba mengeri tauka menua pesisir.
“Ambika banding, bisi siti kes ba Selangau pun taun tu lalu nya pelilih mit ba menua pesisir,” ku iya.
