KUCHING: Perau Perang Iban berumur lebih 100 taun entara siti keresa lama deka dipandang ba Kompleks Muzium Sarawak, ku Direktor Opis Muzium Sarawak (JMS), Tazudin Mohtar.
Tazudin madah, Perau Perang Iban nya ngundan mayuh sejarah bepun taun 1915 kelia.
“Perau Perang Iban tu diambi piak JMS kena bulan Disember 1969 suba, tu entara siti artifak ti chukup lama bisi ba Kompleks Muzium Sarawak.
“ Perau tu kebendar iya diempu siku bansa Melayu ti benama Ate lalu dibeli Tuai Rumah Anding Manja begulai enggau semilan iku peranak rumah panjai di Gensurai,” ku iya.
Nangkannya, perau nya ngembuan mayuh cherita lama ke udah nyadi kelia ti ulih dipandang ngagai mensia mayuh, ku tandu iya
Tadzudin madah munyi nya lebuh dirandau pemberita beserimbai enggau pengawa miring Perau Perang Iban di Muzium Islam Sarawak, kemari.
Berebak enggau nya, Tazudin berasai temegah enggau beterima kasih ngagai raban bansa Iban ti udah ngatur pengawa miring sebedau mindahka perau nya ngagai palan bukai.
“Perau tu deka dipandang di ringkat empat di Kompleks Muzium Sarawak,” ku iya.
Tazudin mega madah, penatai asal di menua tu deka ditegapka agi kelimpah perengka main asal enggau adat.
“Aku mega berasai temegah laban ngembuan raban bansa ti semampai angkunka adat diri empu laban pengawa nya deka mai pemaik tu ulih matak bala temua, “ ku tandu iya.
Nangkannya, Tadzudin madah nya endang tanggungpengawa piak Opis Muzium Sarawak ti deka ngetanka main asal tauka keresa pesaka lama di menua Sarawak.
PenyimpanPengawa miring nya diketuai Pemantu Pansik Bagi Iban Kaunsil Tusun Adat Sarawak (Mais) Philip Igai Melina dibantu ex-Tuai Rumah Batu Lintang, Layar Uking Nawang enggau Chairman Rumah Panjai Batu Lintang, Layar, Tumas Sujang.
