Perengkaguna ba Pantai Tanjung Kembang deka dikemanah

KABONG : Mensia mayuh ke nguan pelilih Kabong terus nerima buah pemansang ari Adun Kabong, Mohd Chee Kadir.

Iya madah,projek ke beungkus nyauka manggai RM1 juta udah dikemendar nengah Projek Pemansang Menua Pesisir (RTP) taun 2019 ungkup sitak Kabong sereta benung dipejalai.

Apin lama ke udah, Chee Kadir bisi ngabas sereta nyerahka taba dua projek nya ngagai Ejensi Perintah iya nya Kaunsil Pelilih Saratok (MDS) ke diberi tanggungpengawa ngemata ke projek nya.

“Projek ngaga baru Masjid Lama beungkus RM500,000 diatu benung dipejalai ke diatu sereta disadang tembu tengan taun baru (2020).

“Penembu masjid nya ila disadang ulih mutar ke penanggul sekut alai besembiang baka ke selalu ditapi mensia mayuh ditu lebuh datai maya hari besai.

“Tang anang salah anggap, ukai mega reti nya aku mina gagit ngemerat ngemansang ke masjid aja.

“Pengarap bukai (Kristian) mega bisi nerima bantu enggau tulung ari aku ngelama tu.”ku iya.

Chee Kadir mansutka jaku nya ngagai pemberita rambau meresa taba palan Projek Ngaga Baru Masjid Lama enggau Projek Ngemanah Perengkaguna Palan Rekreasyen ba Tanjung Kembang ke beungkus RM300,000 ditu, apin lama ke udah.

Udah tu ku iya, Pantai Tanjung Kembang deka ngembuan perengkaguna ungkup mensia mayuh ke meruan dikena nyambut penatai mensia mayuh ti bisi ngelawa pantai nya dudi hari.

Ngakun ke penatai mensia mayuh majak nambah ninting hari ngelawa pantai nya kebuah iya (Tanjung kembang) beguna bendar perengkaguna ti menyana.

“Berasai lantang amat ati, pengudah projek ngemanah palan tu (Pantai Tanjung Kembang) dikemendarka Perintah Sarawak nengah agih RTP taun tu (2019).

“Aku nemu pemar ditapi mensia mayuh lebuh sida datai ngelawa pantai tu ngelama tu.

“Nya alai,penembu projek tu ila di kearapka ulih mutar penanggul ti nekul sida.”ku iya.

Sebedau tu, Pantai Tanjung Kembang endang udah bisi perengkaguna ungkup mensia mayuh tang apin chukup ketegal enda tetapi ke penyampau penatai pengelawa ti majak nambah.

Sama bisi datai nyereta pengawa tu Pemesai Penyambung Mensia Mayuh Adun Kabong Nur Elffie Amir, pengari ari Opis MDS Tinggom Bat enggau Justin (Enginner) sereta bala bukai.