Peresa pengangat isi, makai dalam kelas entara atur baru di sekula

KAJANG: Pengawa meresa pengangat isi nembiak enggau makai dalam kelas maya jam ngetu, entara atur baru ti deka dipejalai pengudah sekula di menua tu dibuka.

Menteri Pelajar, Dr Mohd Radzi Md Jidinmadahka atur nya netapka bala pengajar dipinta meresa pengangat isi nembiak lebuh sida datai ba pintu pagar sekula enggau enti sema sida bisi kelai, atur bukai patut dipejalai.

“Kitai mega sedarka nembiak tu kandang bedarat nurun ke sekula lalu bisi sekeda ngena ensikal ngujungka tikas pengangat isi sida niki mimit ari 37.5 darjah celsius.

“Nembiak tu deka diasuh belelak dulu nentuka tikas pengangat isi sida pulai baka selama enggau tau diperesa sekali agi.

“Tiap sekula mega meseti bisi bilik isolasyen ke alai bala nembiak ulih dibai ngagai bilik nya enda bisi sebarang kelai.

“Piak sekula mega meseti telefon ngagai palan pengerai ti semak enggau sekula nya ungkup atur bukai kelimpah ari telefon ngagai bala apai indai nembiak,” ku iya.

Mohd Radzi mansutka jaku nya pengudah ngatur pejalai ngabas seraya gawa ungkup besedia muka sekula baru ba Sekula Sekondarti (SMK) Engku Husain, Semenyih ditu apin lama ke udah.

Atur baru nya entara Standard Atur Pengawa (SOP) Sekula Dibuka Baru Opis Menteri Pelajar ti berengkah disadung ngagai sekula enggau ulih diambi ba website opis menteri nya kemari.

Atur ti ngundan 34 lambar nya diasilka silik enggau mungkur semua pekara begulai enggau Opis Menteri Pengerai (KKM) enggau Kaunsil Pengelikun Menua (MKN).

Nangkan nya ku Mohd Radzi, apai indai enda ibuh irau pasal atur nyaga takah lebuh anak sida ba kantin sekula laban jam ‘rehat’ deka dipejalai berenggat enggau semua nembiak meseti makai ba dalam kelas diri.

“Bala nembiak meseti meli pemakai ti ditungkus enggau sida deka bebaris nitihka atur ti ditetapka enggau penyauh semeter entara pangan diri sebedau pulai ngambi makai dalam kelas diri.

“Nya alai, atur ba kantin deka manah agi lalu apai indai enda ibuh irauka anak sida berebut ba kantin laban jam ‘rehat’ deka dipejalai berenggat nentuka ukai semua nembiak begelumu ba kantin.

“Kami mega deka ngubah baru jam ‘rehat’ nya enggau ngatur takah bala nembiak ulih ‘rehat’,” terang iya.

Terang iya, mija tiap kelas meseti bisi takah semeter enggau nembiak ba kelas nya deka dipindah ngagai kelas bukai enti penyampau tubuh nembiak ba siti kelas lebih ari penyampau ti ditetapka nentuka bala nembiak nyaga takah enggau pangan diri.

Ku iya, penuduk nembiak dalam makmal mega bisi takah ngambika Pengawa Belajar enggau Ngajar (PdP) ulih dipejalai enggau manah sereta likun.

Ngelansa pasal pejalai nembiak ba sekula, iya madahka jalai ditengah bala nembiak deka ditanda ngambika sida bisi takah enggau pangan diri.

Pia mega ku iya, bala pengajar mega enda ibuh irau laban atur ti dikeluarka opis menteri mega ngemeratka pengelikun enggau pengerai sida.

“Bala pengajar anang irauka sida deka besekut dalam bilik pengajar laban piak sekula meseti nentuka bisi takah enggau pangan diri taja dalam bilik pengajar.

“Bala pengajar deka dipindah ngagai bilik ke engkeman enggau sida nyengkaum pusat sumber enggau bilik bukai ngambika atur nyaga takah enggau pangan diri semampai dikemerat,” tandu iya.

Nambahka nya ku iya, opis menteri mega ngeluarka atur ti sebaka ungkup bala nembiak ti bemalam ba buding ke alai katil sida diginsit semeter entara katil bukai kelimpah dewan makai mega ngemeratka nyaga takah entara bala nembiak.

Ku iya, lebuh sekula dibuka, piak sida deka beratika atur nya enggau deka nambahka atur nitihka pematut nentuka bala nembiak ti nurun ke sekula nyereta PdP ti selamat.

“Kitai ngarapka bala nembiak semampai nyaga takah enggau pangan diri ba sekula sereta maya nurun enggau pulai ari sekula lebuh sida udah diasuh besekula baru,” ku Radzi.-Bernama

Suara Sarawak