KUCHING: Menteri Pemansang Indu, Ruang Bilik enggau Komuniti, Datuk Seri Nancy Shukri merambu orang kena pasung dikemendar beperesa pengerai sebedau ngaga pemutus dikena ngaga ripot polis tauka enda ba timpuh 72 jam.
Iya mansutka jaku nya dikena meri timbal ngagai ripot media kena 8 Julai bekaul ripot dawa siku orang ti enda tepantup ati enggau servis Palan Servis Krisis Sekali Ngetu (OSCC) ba Sarawak dikena mutar kes siku indu dikenuku dipasung empai lama.
Ngelansa senentang kes nya, Nancy madah, orang kena pasung nya napi penanggul irau sereta nguji beperesa pengerai tang bedau nyikap diri ngaga ripot polis.
“Sekeda orang kena pasung napi penanggul malu tauka kakang ati ba mayuh pekara lebuh mutus ngaga ripot polis.
“Laban ripot polis patut digaga ba timpuh 72 jam, aku merambu orang kena pasung diberi pilih bejalaika pengawa beperesa dulu ngambi sida muntang ngaga pemutus pengudah nya sekali ke sida deka ngaga ripot polis tauka enda,” ku iya.
Nancy mansutka jaku nya rambau Program Ngayuh Ensikal Pengawa Pengasih Borneo ditu, sehari tu.
Naka diatu, ripot polis patut digaga sebedau polis ngeletak atur ngasuh lutur meresa enggau ngumpul bukti dikena bejalaika pansik lalu nya meseti disetuju orang kena pasung nya empu.
Terang Nancy, iya deka berandau enggau Menteri Pengerai bekaul pekara nya dikena ngulih buah runding enggau atur ti patut diambi.
“Tu semina perambu lalu pemutus kepenudi bekaul atur tu bepanggai ba Opis Menteri Pengerai empu,” ku iya.
