SIBU: Pengawa beperesa RT-PCR Covid-19 agi diguna ngambika muntang nyidi pengerekai Covid-19.

Nya kebuah, Kaban Parlimen Bintulu Datuk Seri Tiong King Sing ngansak Opis Menteri Pengerai Malaysia (KKM) terus netapka mensia mayuh beperesa RT-PCR Covid-19.

Nya alai, pengawa beperesa RT-PCR Covid-19 patut ditetapka enggau bayar ke murah agi ngambi enda nating belanja mensia mayuh,ku iya.

Iya ti bechuntoka menua China madah, rega beperesa RT-PCR din semina 40 RMB (kurang ari RM30) lalu rega nya engka murah agi enti dibeli mayuh.

“Nama kebuah ungkus beperesa RT-PCR di Malaysia mar amat? KKM mesti meresa baru ungkus tu.

“Kebuah pia laban rega sengkabung mua ulih dikurang, nama kebuah rega beperesa RT-PCR enda ulih dikurang?” ku tanya iya ba ruai Facebook, malam Hari Empat tu tadi.

Presiden Parti Progresif Demokratik (PDP) nya madahka iya ningkah pemutus KKM deka ngetu ngena RT-PCR tang meransang mensia mayuh ngena kit beperesa pengerai (RTK-Antigen).

Ku Tiong, mayuh pesakit kurang penatai pemisi bepanggai ba pengawa beperesa RT-PCR ti disediaka KKM ngambi nemu nilai kitaran ambang (CT) nentuka tikas pengerekai sereta tikas pemedis ketegal penyakit nya.

Ku iya, semua orang patut enda setujuka atur perintah deka ngetuka pengawa beperesa ngena RT-PCR.

“Chara ti engkeman nya meransang mensia mayuh beperesa kediri di rumah ngena RTK-Antigen.

“Enti sema positif, sida mesti ngagai sepital tauka klinik ngambi beperesa ngena RT-PCR sereta nemu tikas CT nya.

“Nengah CT tu, raban bekuasa deka nemu chara ke manah agi netapka kategori pesakit ba Kategori 3 enggau 4 lalu ngatur pesakit tama sepital ngambi diperubat tauka semina diberi penerang ke patut,” terang Adun Dudong nya.

Ba ripot ke dulu, Menteri Pengerai, Khairy Jamaluddin ngansak mensia mayuh anang bepanggai ba pengawa beperesa ngena RT-PCR laban menua kitai ngalih ngagai endemik.

Khairy mega madahka pengawa beperesa ngena RTK Antigen pen udah chukup ngambi nemu sekalika kena rampit Covid-19 tauka enda sereta murah enggau nyamai dibeli ba farmasi.