Perintah baru ngempung rayat

SRI AMAN: Sukung tegut rayat beguna amat nentuka pemansang ulih dipejalai nitihka diperambu, ku Kaban Parlimen Saratok Ali Biju.

Ku iya, tu nyengkaum sukung ari bala ketuai raban bansa nyengkaum bala tuai rumah ti nyadi jematan nyambung rayat enggau perintah.

“Pejalai ke rumah panjai ukai deka bekimpinka parti tang deka nerang pasal agenda pemansang enggau pekara ti nyadi diatu.

“Nya alai kami ngelaluka semua ketuai raban bansa enggau bala tuai rumah bela sampal datai ngulu program tauka pengerami ke diatu nadai ngira ari Perintah Besai tauka Perintah Sarawak.

“Kebuah pia laban semua program diatur endang ungkup rayat, nadai milih pangkat enggau bansa, ngambika bela ampit buah pemansang dibai kami ti dipilih nyadi pengari,” ku Ali madah nyemetak.

NGEMPUNG RAYAT… Ali meri penerang pasal pejalai sida sebuat ngagai Rumah Joel, kemari.

Ali mansutka jaku tu beserimbai enggau pejalai Kimpin Ngitau Tambai Malaysia enggau Program Merdeka@Komuniti Renggat Pelilih Sri Aman 2019 di Rumah Joel Kion, Bijat Ai di Lingga.

Iya madahka penatai sida sebuat ukai deka ngaga penyarut tang deka ngempung peranak rumah panjai.

Kelimpah ari nya, iya mega minta kerejasama enggau penemu ketuai raban bansa ngempung rayat sereta ngatur pengawa ke patut.

“Kita bela tau minta projek enggau belanja ari Perintah Sarawak enggau Perintah Besai laban semua nya endang datai ari rayat lalu deka dipulai ngagai rayat.

“Semua rayat bisi hak ngasaika pengelantang enggau pengidup ti menyana ari pemansang dipejalai kelebih agi ba infrastruktur enggau perengkaguna pemun,” ku iya nerang.

Pia mega ku Ali, rayat anang irauka berita ti bisi ngerimbas pending pasal Pakatan Harapan (PH) laban gempung perintah nya nadai kala mai rayat nyukung pengawa ti salah.

“Anang berasai nangi laban kitai sama tau ngulu pengawa ti diatur Perintah Besai tauka Perintah Sarawak.

“Perintah baru tu deka meri penemu ke baru dikena ngemansangka menua kitai nuju menua maju,” tandu Ali.

Nya kebuah, PH deka ngaul kerejasama enggau Perintah Besai ngambi sama ngemajuka menua kitai tu.

Sama datai pemesai pemadah Sri Aman, Tuai Rumah Joel, Kaban Komiti Dap Sarawak Leon Jimat Donald, Penyelaras PKR Sri Aman Norina Umoi Utot, bala tuai rumah sereta bala bukai.

Suara Sarawak