Perintah Besai kih, S’wak asa!

KUCHING: Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit madahka diri berasai asa sentang penerang Menteri Pekara Wang ba pengawa nyeleti sekula repuk di Sarawak.

Hari Satu tu tadi, Lim Guan Eng madahka kereja nyeleti sekula repuk di menua tu deka dipejalai pengudah Perintah Sarawak mayar utang RM350 juta ungkup renggat keterubah.

Ku iya, Guan Eng madahka asil enggau belanja renggat keterubah projek nyeleti sekula repuk di Sarawak sepenyampau RM350 juta deka diberi tekala nya pengudah Perintah Sarawak mayar utang.

Pia mega ku iya, Kepala Menteri Datuk Patinggi Abang Johari Tun Openg udah madahka sedia mayar pulai pinjau renggat keterubah penyampau RM350 juta enda lama agi.

Taja pia, penerang Guan Eng disempama baka bebatak jaku, bedau entap penemu, ku Fatimah.

“Tang sekula repuk di Sarawak majak repuk lalu patut diseleti enggau jampat.

“Bala anak kitai ti nerima empas laban enda ulih belajar ba endur ti likun enggau lantang,” ku Fatimah lebuh dirandau tadi.

Fatimah nyemetak madahka bala nembiak di Sarawak patut belajar endur ti lantang baka bakih sida di Semenanjung Malaysia.

“Chukup asa. Ni semengat Malaysia?,” ku iya nanya.

Suara Sarawak