Perintah besai patut fokus pekara ti lebih beguna

KUCHING: Perintah Besai patut meri fokus ngagai pekara ti beguna agi bekaul enggau pekara pelajar ari merambu ngemasukka tulis Jawi tauka kaligrafi Jawi ngagai pelajar nembiak sekula primari.

Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Datuk Sri Fatimah Abdullah madah kebendar iya bedau nyengala mereti enggau perambu nya tang perintah besai patut meri fokus ngagai pekara bukai ti endang beguna diatu.

“Kebendar aku agi bedau mereti sida deka ngemasukka tulis Jawi tauka kaligrafi Jawi dalam pelajar jaku Melayu laban nya dua pekara bebida.

“Taja pia, mayuh pekara bukai ti lebih besai patut diperati baka kualiti pelajar enggau kualiti pelajar pengudah tembu sekula bala rebak baru,” ku iya.

Fatimah bejaku munyi nya lebuh ditanya pemberita ba Bengunan Baitul Makmur ditu, kemari.

Datuk Sri Fatimah Abdullah

Ku iya, pekara ti lebih beguna maya tu patut diperati laban ngemasukka tulis Jawi tauka kaligrafi Jawi ukai mega nyadi isu ti nyema dipejalai enggau meruan.

“Pekara baka kualiti perengkaguna pengajar ba sekula, chara ti efektif bala pengajar ngajar enggau revolusyen 4.0 lebih beguna dipejalai maya tu.

“Tang nyema pekara nya meri pemaik kitai tetap nyukung,” ku iya.

Lebuh ditanya sentang penemu Adun Muara Tuang Datuk Idris Buang bekaul enggau elaun konsilor patut ditambah RM1,500 ngagai RM3,000 Fatimah nyaut pekara tu patut dibai berunding di kabinet.

“Nya penemu iya, tang pekara nya patut dikerandau dalam aum kabinet laban meri empas ngagai pekara belanja.

“Tambah mega kaunsilor tu ukai gawa penuh sida bisi servis kediri sebaka enggau tuai kampung.

“Pekara tu patut dipeda enggau silik lalu patut dikerandau dulu sebedau ngaga nama-nama pemutus,” ku iya.

Suara Sarawak