Perintah deka rayat ngasai pengelantang ti enda bechiping

LUBOK ANTU: Program Pengerami Begulai enggau Pemesai nyadi pelasar dikena Kaban Parlimen Lubok Antu Jugah Muyang besemak agi enggau rayat ba parlimen iya.

Iya madah, ari nya iya deka nemu peminta enggau penanggul sida lalu naka alah mutarka pekara nya.

“Kitai meseti ngemeratka pengelikun rayat, kitai deka meda semua rayat di Parlimen Lubok Antu ulih bekerejasama sereta bebasaka pangan diri.

“Semua tu deka nentuka hak rayat ditu ulih diintu kelimpah projek pemansang ke deka digaga ke pemaik semua enda ngira ari ni penemu politik sida,” pia ku iya madah maya Pengerami Pemesai Begulai enggau Rakyat di Rumah Sujang, Samueh, Batu 4, ensana.

Jugah madah, polisi perintah besai endang dekaka genap iku rayat ngasaika pengelantang ti enda bechiping.

“Nya alai, kitai minta bala tuai rumah enggau tuai raban bansa meseti bejalaika tanggungpengawa enggau manah ngambika semua pelin pemansang perintah ulih digaga sereta datai tuju enggau mujur.

“Tuai rumah enggau ketuai raban bansa mega patut bekempit enggau bala rayat ngambika penanggul ke bisi nuntung ulih diputar enggau manah ti besai reti ngagai reti penyerakup enggau pengelantang,” ku iya.