Perintah enda bechiping meri bantu – Manyin

TEBEDU: Perintah Sarawak seruran mantu rayat enggau enda becihiping sereta nadai kala berundingka sapa sida.
Menteri Pelajar, Sains Enggau Pansik Teknologi Sarawak, Datuk Amar Michael Manyin Jawong madah, perintah Gabungan Parti Sarawak (GPS) udah mai pemansang ungkup pemaik semua rayat.
“Diatu perintah naka ulih ngemujurka pemansang perengka guna lebih agi ba kandang menua pesisir.
“Pemansang tu digaga dikena nentuka semua rayat bela ngasaika pemansang ke sama sekalika ba mengeri tauka menua pesisir,” ku iya.
Manyin ke mega Adun Tebedu madah munyi nya maya Nyuaka Chek Projek Mit Menua Pesisir (MRP) ungkup sitak Kunsil Nengeri (Dun) Tebedu di Kampung Pichin kena Hari Lima tu tadi.
Berebak enggau nya, iya madah perintah nengeri udah ngemendarka agih belanja sepenyampau RM750,000 ngagai 42 penerima ungkup projek MRP nya.
Nangkan ke nya, iya meransang bansa Bidayuh patut terus nyukung perintah GPS sereta ngetanka lapan penuduk Dun Bidayuh ba Pengawa Bepilih Besai Nengeri (PRN) ke-12 ila. -Ukas