Perintah mantu rayat nadai bekira bansa

MIRI: Perintah Gempung Parti Sarawak (GPS) enda kala nekan sebarang bansa di nengeri tu, ku Sapit Kepala Menteri Datuk Amar Douglas Uggah Embas.

Iya madah, kebuah pia laban ngelama tu perintah seruran meri bantu ngagai mensia mayuh tauka komuniti nadai bekira bansa enggau pangarap.

Kenu ku iya, semua tuduh ke datai ari piak luar pasal Perintah Sarawak ti nadai kala meri sebarang bantu tauka pemansang endang jaku ngapa.

“Kitai deka terus nentuka bansa Penan enda tinggal ari arus pemansang,” ku iya rambau Pengerami Makai Lemai dikena ngumpul belanja diatur Gerempung Pemansang Tipun Penan Sarawak Malaysia (Petipun) ditu, kena 3 Ogos tu tadi.

Uggah ke mega Menteri Betanam Betupi Moden, Tanah Adat enggau Pemansang Kandang Menua madah, piak sida merambu muka sekeda palan ngumpul produk ba sebengkah sitak sebedau iya dianjung ngagai makit luar.

BEJADI… Uggah (lima kiba) malu kayu tauka ‘Atui’ dalam jaku Penan kelai bejadika pengerami Makai Lemai ke diatur Petipun ditu, seraya dikemataka bala bukai.

Ku iya, tu dikena mantu sida nyual produk betanam betupi baka asil buah tanam enggau mega kraf jari ba dalam menua.

“Aku deka berandau enggau pengari rayat genap sitak Penan enggau Presiden Petipun Temenggong Datuk Hasan Sui dikena nentuka palan ke engkeman.

“Aum deka diatur enggau pengari rayat pelilih menua enggau Petipun enda lama agi awakka kitai ulih ngelanggur dini endur palan ngumpul produk ke ulih dikena ngemansangka raban bansa Penan,” ku iya.

Ba pengerami nya, Uggah bisi ngungkupka agih belanja RM50,000 ungkup Petipun.

Kelimpah nya, iya mega madahka pemeri agih belanja ari Menteri Utiliti Datuk Sri Dr Stephen Rundi Utom (RM30,000), Kaban Parlimen Bintulu Datuk Seri Tiong King Sing (RM20,000), Adun Mulu Datuk Gerawat Gala (RM15,000).

Udah nya Kaban Parlimen Baram Anyi Ngau, Kaban Parlimen Hulu Rejang Datuk Wilson Ugak Kumbong, Adun Telang Usan Dennis Ngau, Adun Murum Kennedy Chukpai Ugon bela meri agih belanja RM10,000.

Bela bisi datai Penyanding Penemu Pansik Sains Nengeri Sarawak Datuk Patinggi Tan Sri Alfred Jabu Numpang enggau Residen Kapit ti mega Chairman Pengatur Pengerami Nyurak Keti.

Suara Sarawak